Azərbaycanın informasiya təhlükəsizliyinə yönələn təhdidlər aradan qaldırılır
27-06-2022, 08:20. Разместил: admin44
Rusiya Federasiyanın xarici işlər naziri Serqey Lavrovun Azərbaycana səfəri çərçivəsində iki ölkənin xarici işlər nazirləri tərəfindən 24 iyun 2022-ci il tarixdə imzalanan “Azərbaycan Respublikası Hökuməti ilə Rusiya Federasiyası Hökuməti arasında beynəlxalq informasiya təhlükəsizliyinin təmin edilməsi sahəsində əməkdaşlıq haqqında Saziş” informasiya təhlükəsizliyi sahəsində mövcud olan təhdidlərin qarşısının alınması məqsədi daşıyır. Sazişdə informasiya təhlükəsizliyinin təmin olunmasına əsas təhdidlər sırasında dövlətlərin suverenliyi, təhlükəsizliyi və ərazi bütövlüyünün pozulmasına yönəlmiş aktlar, mühüm informasiya infrastrukturu obyektlərinə kompüter hücumları, terrorçuluğun təbliğatı kimi hallar yer alır.
Hazırda bu sazişin imzalanması ilə Ermənistanda və faktiki olaraq separatçılar arasında gərginlik yaşanması, narazılıqlar bildirilməsi adı çəkilən sənədin mühüm önəm daşımasından xəbər verir.
Sazişin ən böyük əhəmiyyəti odur ki, bu, cari il fevralın 22-də Moskvada Azərbaycan Prezidenti İlham Əliyev və Rusiya Federasiyasının Prezidenti Vladimir Putin tərəfindən imzalanan “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə”nin xarakterinə uyğundur. Digər tərəfdən, bu sənəd Rusiyadan Azərbaycan məkanına bundan sonra yönəldiləcək təhdidlərin qarşısının alınması niyyəti ilə bağlıdır. Bu fikri bir qədər də konkretləşdirib deyə bilərəm ki, uzun bir dövr ərzində Rusiyada kök atan erməni lobbisinin himayədarlığı ilə bu ölkədə işğalçı ölkənin anti-Azərbaycan təbliğat şəbəkəsi fəaliyyət göstərir və bu şəbəkə daim respublikamızın əleyhinə istiqamətlənən, suverenliyimizə, ərazi bütövlüyümüzə təhlükə yaradan, həmçinin separatçılıq təbliğatına xidmət edən qərəzli informasiyalar yayır. Həmin qrupun Vətən müharibəsindən sonra daha da fəallaşması bu gün də açıq-aydın nəzərə çarpır. Sazişin imzalanması Azərbaycan əleyhinə bu cür fəaliyyətin qarşısının alınması istiqamətində iki ölkə tərəfindən atılan mühüm əhəmiyyətə malik addımdır.
Azərbaycan-Rusiya hökumətləri arasında beynəlxalq informasiya təhlükəsizliyinin təmin edilməsi sahəsində əməkdaşlıq haqqında sazişdə yuxarıda vurğulanan hallardan əlavə, dövlətin daxili işlərinə qarışmaq, habelə ictimai qaydanın pozulması, millətlərarası, irqlərarası və konfessiyalararası ədavətin qızışdırılması da münasibətlərin inkişafına əngəl törədən meyillər kimi bildirilir. Şübhəsiz ki, burada separatçılığın, o cümlədən ekstremizmin, nifrət və diskriminasiya yaradan, zorakılığa və qeyri-sabitliyə təhrik edən irqi və ksenofobiya fikirlərin təbliğ olunması xüsusilə diqqətdə saxlanılır.
Tərəflərin üzərlərinə adı çəkilən sazişlə təhlükəsizlik və sabitliyin qorunub saxlanılması, suverenliyə, ərazi bütövlüyünə, dövlət sərhədlərinin təhlükəsizliyinə və toxunulmazlığına qarşılıqlı hörmət bəslənilməsi, mübahisə və münaqişələrin sülh yolu ilə tənzimlənməsi, güc və güclə təhdid tətbiq edilməməsi kimi önəmli öhdəliklər qoyulub.
Yeri gəlmişkən, sazişin imzalanmasını zəruri edən bir məqamı da xatırlatmaq istərdim. Bu, Azərbaycanın informasiya təhlükəsizliyinə yönələn təhdidlərə qarşı mübarizəni gücləndirmək məsələsidir. Belə ki, Azərbaycanın xarici işlər naziri Ceyhun Bayramov rusiyalı həmkarı ilə birgə mətbuat konfransında jurnalistin sualını şərh edərkən, bir sıra Azərbaycan mediasının Rusiyada bloklanması mövzusuna toxunaraq, rəsmi Bakı tərəfindən narahatlıqla qarşılanan bu məqamla bağlı Rusiyanın xarici işlər naziri Sergey Lavrovla da müzakirə olunduğunu bildirib. “Son aylarda bir sıra faktlarla bağlı problemli suallar yaranıb. Azərbaycanın bir neçə özəl media resursları Rusiya Federasiyasında, bu ay isə “RİA Novosti” Azərbaycanda bloklanıb. Bu, təbii olaraq bizi narahat edən mövzudur və bugünkü görüşlərdə də bu mövzuya toxunuldu. Əsas diqqət ona yönəldilib ki, biz nəticələri aradan qaldırmaq, belə halların qarşısını almaq üçün daha stimullaşdırıcı mexanizmlər işləməliyik. Onların qarşısını almağa çalışmalıyıq. Bu baxımdan dəyirmi masaların keçirilməsi faydalıdır”, – deyə C.Bayramov bildirib.
Öz növbəsində Rusiyanın xarici işlər naziri Sergey Lavrov da Bakıda keçirdiyi görüşlərdə bu mövzunun müzakirə edildiyini diqqətə çatdırıb: “Ümumi anlayış var ki, bir-birimizin qanunlarına hörmət və bu qanunlara əsaslanan məlumat azadlığı prinsiplərinə əsaslanaraq, biz hər iki tərəfdən aparıcı KİV rəhbərləri arasında xüsusi silsilə tədbirlər keçirəcəyik. Xarici işlər nazirliklərinin informasiya xidmətlərinin himayəsi altında belə məsləhətləşmələri təşkil etmək barədə razılıq var”.
Beləliklə, adı çəkilən saziş, ilk növbədə, informasiya- kommunikasiya texnologiyalarından istifadə edilməklə separatizmə, ekstremizmə qarşı mübarizə, vətəndaşların təhlükəsizliyinin təmin edilməsi sahəsində əməkdaşlıq üçün mühüm önəm daşıyır. Qarabağda nizamlanmış münaqişə, regionda sülhün və sabitliyin bərqərar olması ilə əlaqədar Rusiya KİV-lərində yer alan qərəzli informasiyaların qarşısının alınması baxımından da böyük əhəmiyyətə malikdir.
Məhərrəm SƏFƏRLİ,
Beynəlxalq Jurnalistlər Federasiyasının üzvü.
“Yeni həyat” qəzeti
www.yeniheyet.az
Вернуться назад