Masallının 11 güləşçisi XXV respublika turnirinin mükafatını qazandı
18-11-2019, 14:45. Разместил: yeni321
Nadir Ağayevin xatirə turniriMasallının 11 güləşçisi XXV respublika turnirinin mükafatını qazandı
Masallı Olimpiya İdman Kompleksində Gənclər və İdman Nazirliyi, Azərbaycan Güləş Federasiyası, Masallı Rayon İcra Hakimiyyəti, rayon gənclər və idman idarəsinin təşkilatçılığı ilə SSRİ idman ustası, Əməkdar məşqçi, tanınmış pəhləvan Nadir Yaqub oğlu Ağayevin (1935-1985) xatirəsinə həsr olunmuş yunan-Roma güləşi üzrə yeniyetmələr arasında XXV ənənəvi respublika turniri keçirildi.
Üç gün (15-17 noyabr) davam edən yarışlardan məqsəd yeniyetmələr arasında güləş idman növünün inkişafına və kütləviliyinə nail olmaq, perspektivli idmançıların aşkar edilməsi, idmançılar arasında dostluq əlaqələrini möhkəmləndirmək və onlara vətənə məhəbbət hisslərini aşılamaq, eləcə də Masallı güləş məktəbinin yaradıcısı Nadir Ağayevin xatirəsini yad etməkdir.
Tədbirin açılış mərasimində Masallı Rayon Gənclər və İdman İdarəsinin rəisi Camal Manafov qonaqları və yarış iştirakçılarını salamladı, cənab Prezident İlham Əliyevin rəhbərliyilə ölkəmizin hər yerində olduğu kimi regionlarda da idmançılar üçün hər cür şərait yaradıldığını bildirdi, yeniyetmə güləşçiləri təbrik edərək onlara uğurlar dilədi.Mötəbər yarışlarda əldə edilən nailiyyətlərin ölkə rəhbəri, MOK-un Prezidenti İlham Əliyev tərəfindən idmana göstərilən diqqət və qayğının təzahürü olduğunu vurğulayan Azərbaycan Güləş Federasiyasının vitse-prezidenti, ”Şöhrət” ordenli Elçin Cəfərov iri miqyaslı yarışlara sınaq xarakteri daşıyan bu turnirin əhəmiyyətindən danışdı.
Respublika Gənclər və İdman Nazirliyinin nümayəndəsi Tofiq Eyvazov qeyd etdi ki, Azərbaycan güləşinin təşəkkülü və inkişafı ilə qırılmaz surətdə bağlı olan N.Ağayevin adı bu gün də idmanın kütləviliyinə stimuldur.Nadir Ağayevin yetirməsi, SSRİ idman ustası, Masallı şəhər ərazi nümayəndəsi Kamal Mazanov, turnirin sponsoru, Rusiya Federasiyasının Əməkdar məşqçisi Məşqur Qasımovun qardaşı Sücayət Qasımov və başqaları cənub bölgəsinin güləş rəmzinə, pəhləvanlıq etalonuna dönmüş unudulmaz və xeyirxah insan barədə xatirələrini söyləyib, hər il bu tədbirin yüksək səviyyəli təşkilinə görə müvafiq idman qurumlarına, rayon rəhbərliyinə, zəhməti keçən hər kəsə minnətdarlıq bildirdilər.
Masallı Rayon İcra Hakimiyyətinin məsul işçisi Qəşəm Hadıyev çıxış edərək rayon rəhbəri Rafil Hüseynovun adından gələn qonaqları salamladı, idmançılara uğurlar arzuladı.
Azərbaycan Respublikasının Dövlət Himni səsləndi.
Sonra Beynəlxalq dərəcəli hakim Zakir Məmmədovun raportu ilə AGF hakimlər kollegiyasının sədri, yarışların baş hakimi Qərib Əliyevə komanda heyətlərinin yarışa tam hazırlığı barədə məlumat verildi.
Dünya Güləş Birliyinin mövcud qaydalarına əsasən keçirilən yarışlar AGF-nin beynəlxalq dərəcəli hakimlər kollegiyası tərəfindən idarə olunurdu.
Turnirdə respublikanın ayrı-ayrı rayon (Gəncə, Göyçay, Zəngilan, Cəlilabad, Beyləqan, Kürdəmir, Şirvan, Sabirabad, Lənkəran, Masallı və s.), Bakı və Sumqayıt şəhər idman cəmiyyəti, güləş klublarından (“Dinamo”İC, “Neftçi” İSM, ROİL, “Məhsul”, “Gənclik”, “Hövsan”, “UGİM”, “Təhsil” və s.) 21 komandanı təmsil edən 250-ə yaxın 2005-2007-ci il təvəllüdlü yeniyetmə pəhləvan qüvvəsini sınayırdı.
Turnirin yekununda 11 çəki dərəcəsində fəxri kürsünün ilk üçlüyündə qərar tutan yunan-romaçılar təşkilat komitəsi və sponsor tərəfindən diplom, medal və qiymətli hədiyyələrlə təltif olundular.Medal sayına görə Masallı rayon komandası I, Bakı şəhər ( ROİL) II, Sumqayıt şəhər komandası isə III yerə layiq görüldü.
Masallı güləşçilərindən Ülvi Dadaşov (35 kq), Məhəmməd Sərxanlı (68 kq) birinci, Ramal Mikayılov (35 kq), Orxan Mirzəyev (62 kq) ikinci, Nurlan Əşrəfov, Rza İbadlı (35 kq), Əmrah Əmrahov, Rəvan Həşimzadə (38 kq), Amil Bəşirov (48 kq), Əli Məmmədli (68 kq), Amin Qulamov (85 kq) üçüncü mükafata sahibləndilər.
Yarışların son günü, mükafatlandırma mərasimində Nadir Ağayevin yetirməsi — Avopa çempionu, Beynəlxalq dərəcəli idman ustası, əməkdar məşqçi Əli Əliyev bildirdi ki, əminik ki, bu turnirin qalibləri bacarıq və vərdişlərini daha da təkmilləşdirərək Beynəlxalq yarışlarda da idman nailiyyətləri ilə bizi sevindirəcəklər.Akif AĞAYEV,
“Yeni həyat”,
www.yeniheyet.az
Вернуться назад