Rafiq Bağırov –80
19-05-2022, 16:24. Разместил: admin44
İllərin sınağında
Cəmiyyətdə alnıaçıq, üzüağ insandır Rafiq Bağırov. Yaşadığı ömrün işığı indi ixtiyar çağında bu yolu nurlandırır. Neçə-neçə idarədə çalışıb hörmət qazanan bu insan indi rayonun sayılıb-seçilən ağsaqqallarındandır. Özünün dediyi kimi ağsaqqal cəmiyyətin aparıcısıdır, insanların məsləhət-məşvərət üçün müraciət etdikləri şəxsiyyətdir. Onunla sirdaş olurlar, söz deyir, məsləhət alırlar. Ailə münaqişələri, qonşu narazılıqları olur. Belədə gərək ağsaqqallığını göstərə biləsən. Onda adam mənən rahatlaşır, yaşadığı ömrün şirinliyini dadır. Gəncliyimdə də qocalığımda da həmişə barışdırıcı mövqe tutmuşam. Qarışdırıcı insanlar Şeytan timsalında olur və Tanrı tərəfindən lənətlənir. Allahın verdiyi ömrü elə yaşamalısan ki, əbədi dünyaya köçəndə də səni xatırlayan, yadda saxlayan olsun. Onda ruhun da sevinəcək.
Rafiq Bağırovun ömür yoluna nəzər salanda çalışdığı idarə və müəssisələrdə qazandığı hörmətin şahidi olursan. Gəncliyində onunla çiyin-çiyinə çalışanların bir çoxu dünyasını dəyişsə də yaşayanları bu gün də onun məsuliyyətini, iş bacarığını, həmkarına, işçisinə qayğı ilə yanaşdığını qeyd edirlər.
Bax, Rafiq müəllimin xoşbəxt insan olduğunu haqqında söylənilənlərlə ölçmək olar.
Kimdir Rafiq müəllim? Öz dəst-xətti ilə yazdığı ömürlüyinə nəzər salaq.
1942-ci il rayonun Boradigah kəndində anadan olan Rafiq Həsən oğlu Bağırov atası Böyük Vətən müharibəsində halak olandan sonra Masallı qəsəbəsinə köçmüş, 1950-ci ildə burada 1 saylı orta məktəbdə oxumuşdur. Məktəbi bitirəndən sonra Bakı şəhərində 1968-ci ildə Neft Texnikumunu bitirmiş, Avtomobil nəqliyyatının istismarı ixtisasına yiyələnmişdir.
Elə həmi il Masallı rayonunda işlə təmin olunmuş, ilk əmək fəaliyyətinə MTS-də başlamışdır.
Müəssisənin tələbatına görə əvvəlcə burada texniki normalaşdırıcı, sonra isə təmir emalatxanasında nəzarətçi mühəndis vəzifəsində çalışmışdır.
Müəssisənin fəaliyyətində fəallıq göstərən gənc Rafiq partiya sıralarına keçərək burada kommunistlərə rəhbərlik etmişdir. Müəssisənin iş əmsalını yüksəltmək, işçilərin əmək haqqlarını artırmaq, intizamı möhkəmləndirmək sahəsində bacarığını, istedadını göstərirdi.
Rayon rəhbəri Rafiq Bağırovun idarəetmədə səriştəsini görüb onu Sabir adına sovxozda partiya komitəsinin katibliyinə qərar verir. Bir neçə ildən sonra rayon partiya komitəsi onu Bakı Ali Partiya Məktəbinə göndərir. R.Bağırov imtahanları müvəffəqiyyətlə verib dördillik müdavimlik dövründə partiya işini daha mükəmməl öyrənməsinə nail olur.
Rayona qayıdanda Nizami adına sovxoz partiya komitəsinin katibi vəzifəsində çalışır.
Rayon partiya komitəsi gənclərin irəli çəkilməsi ilə əlaqədar gənc Rafiqi 1978-ci ilin mayında RPK-ya təlimatçı vəzifəsinə gətirir. O, vəzifədən-vəzifəyə püxtələşir, verilən partiya tapşırıqlarını məsuliyyətlə həyata keçirirdi. İki ildən sonra ona daha mühüm sahə tapşırıldı.
1980-ci ildən Masallı Rayon Maddi Texniki Təchizat və Mexanikləşdirmə müəssisəsinə müdir vəzifəsinə irəli çəkildi.
İdarə rayonun bütün təsərrüfatlarının texniki təchizatını həyata keçirdiyindən iş prosesi çox çətin idi. Lakin Rafiq Bağırov bu çətinliyin qarşısında bacarıqla, məsuliyyətlə dururdu.
Ölkəmiz müstəqillik qazanandan sonra Ulu Öndərin yaratdığı Yeni Azərbaycan Partiyasına daxil olmaqla rayonun ictimai-siyasi işlərində fəallıq göstərən partiyanın ilk üzvlərindən olan Rafiq Bağırovun sonralar partiyanın boy sıralarının gənclərin hesabına artırılmasında əməyi olmuşdur.
1994-cü ildən 2001-ci ilə kimi RİH-də Ərazi İdarəetmə şöbəsinin müdiri vəzifəsində çalışmış, eyni zamanda kənd təsərrüfatının inkişafında da əməyini əsirgəməmişdir. Beş ilə yaxın şəhər ərazi nümayəndəsinin müavini vəzifəsində çalışmışdır.
Rafiq Bağırov hər vəzifəsində hörmət qazanmış, işçilərin, ona müraciət edənlərin yaddaşında qalmışdır.
R.Bağırov özü bu barədə fikrini belə ifadə edir:
-Sənə hansı postu tapşırırlarsa orada bacarığını, məsuliyyətini göstərməlisən. Axı insanlar qayğıya, xoş sözə möhtacdırlar. Sənə müraciət edirlərsə, deməli ümid yeri bilirlər. Sənin də borcun onları dinləmək, istəklərini həyata keçirməkdir.
Rafiq Bağırov yaşadığı ömrə görə Ulu Tanrıya şükranlıq, bütün uğurlarına görə ona minnətdarlıq edir. Tanrıya sədaqət, insanlara sevgi bəsləyən müsəlman kimi müqəddəs Kəbənin də ziyarətində olub, Allahdan günahlarına görə aman diləyib, dünyanı qarışdıran Şeytana daş atıb.
Ömrün piraniliyində də cəmiyyətdə alnıaçıq olmaq, elin xeyir-şərində iştirak etməkdən böyük səadət ola bilməz.
Rafiq Bağırova 80-də, 90-da da cansağlığı, ömrünü mənalı yaşamağı arzulayırıq.
Həsənağa ƏLİYEV.
"Yeni həyat" qəzeti,
www.yeniheyet.az
Вернуться назад