Главная > Mədəniyyət > Masallı rayon Mərkəzi kitabxanasında İmadəddin Nəsiminin 650 illik yubileyi münasibətilə tədbir keçirilb

Masallı rayon Mərkəzi kitabxanasında İmadəddin Nəsiminin 650 illik yubileyi münasibətilə tədbir keçirilb


20-05-2019, 15:39. Разместил: yeni321
Masallı rayon Mərkəzi kitabxanasında İmadəddin Nəsiminin 650 illik yubileyi münasibətilə tədbir keçirilb
 
Mayın 20-də “Böyük Azərbaycan şairi İmadəddin Nəsiminin 650 illik yubileyinin keçirilməsinə dair Tədbirlər Planı”na əsasən Masallı rayon Mərkəzi Kitabxanasında rayon Ağsaqqallar şurasının təşəbbüsü ilə tədbir keçirilib.
Tədbirdə ziyalı və ağsaqqallar, yaradıcı insanlar, kitabxana əməkdaşları, müəllim və məktəblillər iştirak ediblər.
İştirakçılar öncə Nəsiminin bədii irsini, yaradıcılığını əks etdirən kitab və fotolardan ibarət sərgini ziyarət ediblər.
Masallı Rayon Ağsaqqallar Şurasının sədri, yazıçı-publisist Ələşrəf Niftiyev geniş məruzə ilə çıxış edərək hürufi təriqətinin nəğməkarı, insan zəkasının, istedadının və hisslərinin gözəlliyinin tərənnümçüsü olan şairin zəngin yaradıcılığından söhbət açıb. O bildirib ki, Azərbaycan xalqının ədəbi və fəlsəfi fikir tarixində dərin iz qoymuş mütəfəkkir şair İmadəddin Nəsiminin yaradıcılığı Şərq xalqlarının mədəni sərvətlər xəzinəsində özünəməxsus layiqli yer tutur. Bu yaradıcılıq uzun illərdən bəri elmi fikrin diqqət mərkəzindədir. 50 il öncə ümummilli lider Heydər Əliyevin təşəbbüsü ilə ölkəmizdə Nəsiminin 600 illik yubileyi keçirildi. Ötən illər ərzində Nəsiminin xatirəsinin əbədiləşdirilməsi istiqamətində mühüm addımlar atıldı. Onun ədəbiyyatda, incəsənətdə parlaq obrazları yaradıldı. 1973-cü ildə çəkilən “Nəsimi” bədii filmi Azərbaycan kino sənətində xüsusi yer aldı, 1979-cu ildə Bakıda mütəfəkkir şairin heykəli ucaldıldı. Bu il isə ölkə Prezidentinin sərəncamına əsasən respublikamızda İmadəddin Nəsiminin 650 illik yubileyi yüksək səviyyədə qeyd edilir.
Masallı Rayon Mərkəzi Kitabxanasının direktoru Əlhəddin Nəzərov çıxışında Nəsimi yaradıcılığının bu gün də insanların mənəvi-əxlaqi cəhətdən kamilləşməsinə xidmət etdiyini, əsrlərlə onun adı əyilməz iradə və öz inanclarına sadiqlik simvolu kimi yüksəldiyini qeyd edib.
Masallı şəhər “Cümə” məscidinin imamı Məftun Hüseynov müasir dünyada İ.Nəsiminin bir çox ideyalarının aktual olduğunu tədbir iştirakçılarının diqqətinə çatdırıb. O qeyd edib ki, Nəsimi səmavi kitabların, o cümlədən Quranın öyrənilməsi ilə Allaha qovuşmağın və yaradana layiq olmağın mümkün olacağını söyləyib.
Şair Xanəli Ağayev Şərqin mütəfəkkir filosofu İ.Nəsimiyə həsr etdiyi şeiri oxuyub.
Masallı şəhər 3 və 5 saylı tam orta məktəblərinin şagirdləri şairin qəzəllərini səsləndirib, “Nəsimi” filmindən səhnə nümayiş etdiriblər.
Tədbirin sonunda çıxışına görə fərqlənən məktəblilər fəxri fərman və kitablarla təltif ediliblər.
 
Akif AĞAYEV,
“Yeni həyat”,
www.yeniheyet.az
 
 шаблоны для dle 11.2
Вернуться назад