Replika

Yadlar doğma olsalar...

Yaxın qohumların evlənməsi ilə əlaqədar  Milli Məclisə çıxarılacaq məsələ ölkədə heç də birmənalı qarşılanmadı. Bəziləri bu məsələni alqışladı, bəzilərinin isə ürəyindən olmadı. Görəsən niyə?
Hələ sovetlər dönəmində xəstə uşaqları xəstəxanaya həkimə aparanda həkimin ilk sualı belə olardı: valideynlərinin yaxın qohumluğu varmı?

Düşünərdik ki, görəsən həkim niyə valideynlərin qohum olduğunu soruşur.  Onlar dayıoğlu, bibiqızı olsalar da gənc, sağlamdırlar. Ancaq həkim bunun elmi açmasını izah edəndə ağlabatan fikirlərlə razılaşmaya bilmirsən.

Bu gün də belə bir ifadə bəzilərinin dilindən düşmür: oğlumuz da var, qızımız da. Ancaq həyatda bu evliliyin acı nəticəsini görürük. Belə evlilikdən  çox vaxt fiziki cəhətdən xəstə, ağıldankəm uşaqlar  dünyaya göz açırlar ki, bu da sonradan valideynlərin göz dağına çevrilir. Xüsusilə bölgəmizdə belə hallara daha çox rast gəlinir.

Digər tərəfdən sonralar xasiyyətləri düz gəlməyən qohumların boşanması bir nəslin bir-birinə nifrətinə dönür. Doğma xala, bibi qayınanalıq edə bilməyəndə bu ən doğmaların bir-birinə düşmənçilik münasibətinə çevrilir.

Odur ki, qohumlar arasında evliliyin qadağan edilməsinə diqqətlə, düşünülmüş halda yanaşılmalıdır. Gənclər sevəndə heç nəyi fikirləşmirlər. Qızın gözəlliyi buna mane olur. Belə gözəl qızı niyə özgələr aparmalıdır. Və ya dayımın var-dövləti niyə yadlara qismət olsun, deyə gözü heç nəyi görmür.

Əslində yadlarla qohumluq bir nəslin böyüməsinə, daha çox qohum tapmasına səbəb olur.
Bir mahnıda deyildiyi kimi: Yadlar gəlib doğma olur, yaxın olur.

Gənclərimiz bu ciddi məsələyə biganə yanaşmamalı, ağlın məsləhətinə diqqət verməli, cəmiyyətin saflığı, sağlamlığına doğma münasibət bəsləməlidirlər.





HƏSƏNAĞA.шаблоны для dle 11.2