Masallıda “Rəqəmsal mühitdə uşaqların zərərli informasiyadan qorunması” adlı maarifləndirici tədbir
- 13-02-2026, 19:26
- Təhsil
- 0
- 1 112
13 fevral tarixində Masallı Rayon İcra Hakimiyyəti, Masallı Tarix-Diyarşünaslıq Muzeyi və Gənclərin İnkişaf və Karyera Mərkəzinin Lənkəran-Astara Regional nümayəndəliyinin Masallı bölməsinin birgə təşkilatçılığı, eləcə də Lənkəran-Astara Regional Təhsil İdarəsinin Masallı rayon üzrə Təhsil sektorunun dəstəyi ilə Masallı şəhər İsfəndiyar Zülalov adına 5 saylı tam orta ümumtəhsil məktəbində Uşaqlara dair Strategiyanın həyata keçirilməsi üzrə Milli Fəaliyyət Planının icrası çərçivəsində “Rəqəmsal mühitdə uşaqların zərərli informasiyadan qorunması” mövzusunda maarifləndirici tədbir keçirilib.
Tədbirdə Masallı Tarix-Diyarşünaslıq Muzeyinin direktoru Ənitqə Tağıyeva, Masallı Rayon İcra Hakimiyyəti başçısı aparatının böyük məsləhətçisi və Uşaq hüquqlarının müdafiəsi üzrə Komissiyanın məsul katibi Zamin Məmmədov, Gənclərin İnkişaf və Karyera Mərkəzinin Lənkəran-Astara Regional nümayəndəliyinin Masallı bölməsinin direktoru Orxan Əliyev, müəllimlər və şagirdlər iştirak ediblər.
Çıxış edənlər rəqəmsal mühitin müasir dövrdə uşaqların həyatında tutduğu mühüm roldan bəhs edərək, internet və sosial şəbəkələrdən istifadə zamanı yarana biləcək risklər barədə ətraflı məlumat veriblər. Bildirilib ki, rəqəmsal texnologiyalar uşaqların təhsil alması, dünyagörüşünün formalaşması və informasiya əldə etməsi baxımından geniş imkanlar yaratmaqla bərabər, zərərli və təhlükəli məlumatların təsiri onların psixoloji və mənəvi inkişafına mənfi təsir göstərə bilər.
Tədbirdə vurğulanıb ki, uşaqların rəqəmsal mühitdə təhlükəsizliyinin təmin olunması yalnız təhsil müəssisələrinin deyil, eyni zamanda valideynlərin və cəmiyyətin birgə məsuliyyətidir. Məruzəçilər şagirdlərə sosial şəbəkələrdən düzgün istifadə qaydaları, şəxsi məlumatların qorunması, internetdə ünsiyyət zamanı etik davranış normaları və təhlükəli məzmundan uzaq durmağın vacibliyi barədə tövsiyələr veriblər.
Tədbir zamanı yeniyetmələrlə interaktiv diskussiya aparılıb, onların mövzu ilə bağlı fikirləri dinlənilib və sualları cavablandırılmışdır.
