“Heydər Əliyev və Azərbaycan dili” – Masallıda tədbir

1-08-2023, 18:22
Maraqlı

Masallı Rayon İcra Hakimiyyətinin, YAP rayon təşkilatı, Masallı Tarix-Diyarşünaslıq Muzeyi, Lənkəran-Astara Regional Gənclər və İdman İdarəsinin Masallı rayonu üzrə sektoru və Rayon Mərkəzləşdirilmiş Kitabxana Sisteminin birgə təşkilatçılığı ilə 1 avqust - Azərbaycan əlifbası və Azərbaycan dili gününə həsr edilmiş “Heydər Əliyev və Azərbaycan dili” mövzusunda tədbir keçirilib.

Masallı Mərkəzi Kitabxanasında təşkil olunan dəyirmi masada təşkilat komitəsinin təmsilçiləri ilə yanaşı ziyalı və ağsaqqallar, yazarlar, mədəniyyət işçiləri və gənclər iştirak ediblər.

Əvvəlcə Ümummilli lider Heydər Əliyevin və şəhidlərimizin əziz xatirəsi bir dəqiqəlik sükutla yad olunub.
Masallı Mərkəzləşdirilmiş Kitabxana Sisteminin direktor əvəzi Zamin Məmmədov Azərbaycan əlifbası və Azərbaycan dili gününün təsis olunmasının
tarixi barədə məlumat verib, Ulu Öndər Heydər Əliyevin bu istiqamətdə atdığı addımlardan bəhs edib.

Bildirilib ki, Ümummilli Lider Heydər Əliyev milli dilimizin xilaskarı kimi tarixə öz əbədi imzasını qoymuşdur. Əsası Ulu Öndər tərəfindən qoyulan dövlət dil siyasəti bu gün ölkə başçısı cənab İlham Əliyev tərəfindən uğurla davam etdirilir.

Masallı Rayon Ağsaqqallar Şurasının sədri, yazıçı-publisist Ələşrəf Niftiyev, tanınmış tənqidçi, filologiya elmləri doktoru Vaqif Yusifli, YAP rayon təşkilatının məsul işçisi Əfrail Fərziyev, yazıçı Dilşad Nüsrətqızı, Bədəlan kənd tam orta məktəbinin dil-ədəbiyyat müəllimi Məhbubə Şahbazova, “Yeni həyat” qəzetinin baş ədəbi işçisi Akif Ağayev doğma dilimizin, mədəniyyətimizin qorunub saxlanılmasından, dövlət statuslu dil kimi Azərbaycan dilinin mənəvi dirilik atributuna çevrilməsi yolunda Ümummili Liderimizin, eləcə də ziyalılarımızın, şair və yazıçılarımızın, dramaturq və dilçilərimizin fədakarlıqlarından danışıb, sitatlar gətiriblər.

Milli sərvətimiz, varlığımızın isbatı olan Azərbaycan dilinin aktual problemlərinə toxunan natiqlər diqqətə çatdırıblar ki, cəmiyyətdəki mövqeyindən asılı olmayaraq ana dilinin gözəlliyini, saflığını qorumaq, onun təmizliyinə xələl gətirən yad təsirlərin qarşısını almaq hamımızın vətəndaşlıq borcudur .