Milli Qəhrəman Səfəralı Məmmədovun xatirəsi anılıb

16-10-2023, 19:34
Maraqlı

Masallı rayonunda Azərbaycanın ilk Milli Qəhrəmanlarından olan Səfəralı Məmmədovun anadan olmasının 60 illik yubileyilə əlaqədar tədbir keçirilib.

Tədbirdə Masallı Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin məsul işçiləri, Sərçuvar kənd ərazi nümayəndəliyinin rəhbərliyi, kənd sakinləri, qəhrəmanın ailə üzvləri, ictimaiyyət nümayəndələri iştirak ediblər.

S.Məmmədov adına Sərçuvar kənd tam orta məktəbində, Milli Qəhrəmanın abidəsi önündə keçirilən tədbirdə əvvəlcə Azərbaycan Respublikasının Dövlət Himni səsləndirilib, şəhidlərin xatirəsi bir dəqiqəlik sükutla yad olunub.

Tədbirdə qəhrəman polisin həyatı və keçdiyi döyüş yolu barədə məlumat verilib.

Bildirilib ki, Səfəralı Məmmədov kimi qəhrəmanlarımızın Vətənimizin bütövlüyü uğrunda gösrtərdikləri misilsiz fədakarlıq indiki və gələcək nəsillər üçün əsl vətənpərvəlik nümunəsidir.

Çıxış edənlər bu gün Səfəralı Məmmədovun ruhunun şad olduğunu, uğrunda döyüşərək canını fəda etdiyi torpaqlarımızın artıq işğaldan azad olunduğunu və həmin torpaqlarda Müzəffər Ali Baş Komandan, Prezident İlham Əliyev tərəfindən şanlı bayrağımızın ucaldıldığını diqqətə çatdırıblar.

Tədbirdə məktəblilərin iştirakı ilə ədəbi-bədii kompozisiya nümayiş etdirilib.

Daha sonra Milli Qəhrəmanın ev muzeyi və məzarı ziyarət olunub.

Məlumat üçün bildirək ki, Səfəralı Məmmədov Ağdam rayon Daxili İşlər Şöbəsində post-patrul batalyonunda tağım komandiri vəzifəsində xidmət edib. O, 1992-ci il fevralın 16-da Xocavənd rayonunun Qaradağlı kənd sakinlərini azğınlaşmış erməni dəstələrindən xilas edən zaman şəhid olub. Səfəralı Qurban oğlu Məmmədov ölümündən sonra “Azərbaycan Milli Qəhrəmanı” adına layiq görülüb. Masallı şəhərində küçələrdən birinə, igid döyüşçünün təhsil aldığı məktəbə onun adı verilib, məktəbində həyətində büstü qoyulub, cəsur döyüşçüyə həsr olunmuş “Qəhrəman polis” adlı sənədli film çəkilib.