Baş Prokurorluq: 378 ədəd ağacın qanunsuz kəsilməsi ilə bağlı cinayət işi başlanılıb

Baş Prokurorluğun Cinayət təqibindən kənar icraatlar idarəsində Respublikanın 8 şəhər və rayonunda qanunsuz ağackəsmə faktları ilə bağlı Ekologiya və Təbii Sərvətlər Nazirliyindən daxil olmuş məlumatlar əsasında Dövlət Ekoloji Təhlükəsizlik Xidməti ilə birgə araşdırma aparılıb.

Baş Prokurorluğun mətbuat xidmətindən AZƏRTAC-a verilən məlumata görə, araşdırmalar zamanı Xaçmaz rayonunun Palçıqoba kəndi, Zaqatala rayonunun Muğanlı kəndi, Qusar rayonunun Avaran-Qışlaq kəndi, Şəmkir rayonunun Dəllər qəsəbəsi, Tovuz rayonu, İsmayıllı və Kəlbəcər şəhəri ərazisində, həmçinin Bakı şəhərində Nərimanov rayonunun Faiq Yusibov küçəsi 45, Səbail rayonunun Badamdar, Suraxanı rayonunun Əmircan qəsəbələrində ümumilikdə 378 ədəd ağacın qanunsuz kəsilməsi nəticəsində təbiətə 90 min manatdan çox ziyan dəyməsi müəyyənləşdirilib.

Aşkarlanmış faktlarla bağlı Cinayət Məcəlləsinin 259.1-ci, 259.2.3-cü və 259.2.4-cü (qulluq mövqeyindən istifadə etməklə, xeyli və külli miqdarda ziyan vurmaqla qanunsuz ağac kəsmə) maddələri ilə cinayət işləri başlanaraq istintaqın aparılması üçün aidiyyəti üzrə daxili işlər orqanlarına göndərilib.




"Yeni həyat" qəzeti,
www.yeniheyet.azшаблоны для dle 11.2