Masallının təhsil müəssisələrində anım tədbirləri keçirilib
- 28-09-2023, 19:03
- Təhsil
- 0
- 336
Lənkəran-Astara Regional Təhsil İdarəsinin Masallı rayonu üztə təhsil sektoruna daxil olan təhsil müəssisələrində 27 Sentyabr - Anım Günü ilə bağlı tədbirlər təşkil edilib.
Tədbirlərdə Dövlət himnimiz səsləndirilib, Vətən Müharibəsi şəhidlərinin əziz xatirəsi bir dəqiqəlik sükutla yad olunub.
Anım Günü barədə şagirdlərə məlumat verən müəllimlər 2020-ci il sentyabrın 27-dən Ermənistanın ölkəmizə qarşı başlayan növbəti hərbi təcavüzünə cavab olaraq, Respublika Prezidenti, Ali Baş Komandan İlham Əliyevin rəhbərliyilə Azərbaycan Silahlı Qüvvələrinin işğal altındakı torpaqlarımızın azad edilməsi uğrunda Vətən Müharibəsinə başladığını, 44 gün davam edən haqq savaşının qəhrəman oğullarımızın şücaəti, şəhidlərimizin qanı, canı bahasına Zəfərimizlə nəticələndiyini bir daha məktəblilərin diqqətinə çatdırıblar.
Təhsil ocaqlarında Anım Günü ilə bağlı konfrans, seminar, mühazirə, “dəyirmi masa”, vebinar, açıq dərslər, ədəbi-bədii kompozisiyalar, foto və rəsm sərgiləri, yaradıcılıq müsabiqələri və intellektual oyunlar, Vətən Müharibəsində qəhrəmanlıq göstərən əsgər və zabitlərlə, qazilərlə, şəhidlərin ailə üzvləri ilə görüşlər, məktəblilər arasında idman növləri üzrə yarışlar keçirilib.
Tədbirlərin keçirilməsində məqsəd şagirdlərə Vətənə sevgi və məhəbbət hisslərinin aşılanması, gənc nəslin vətənpərvərlik ruhunda tərbiyələndirilməsi ilə yanaşı onların istedad və yaradıcılıq potensialının inkişaf etdirilməsidir.
Akif AĞAYEV
"Yeni həyat" qəzeti,
www.yeniheyet.az
