Avropa çempionu Masallı cüdoçularının qonağı olub

Yeniyetmələr arasında cüdo üzrə Avropa çempionu, dünya çempionatının gümüş mükafatçısı Məhəmməd Məmişov Masallı rayonunda cüdoçuların qonağı olub. 

“İdman hamı üçün” layihəsi çərçivəsində təşkil olunan görüş yeniyetmə və gənc cüdoçularımız üçün maraqlı anlarla yadda qalıb.

Əvvəlcə görüşün fəxri qonağı, qalib idmançımız Məhəmməd Məmişov haqqında məlumat verilib. 

Lənkəran-Astara Gənclər və İdman İdarəsinin Masallı rayonu üzrə sektor müdiri Sabiq Cahangirov, M.Məmişovun məşqçi-müəllimi Murad 

Cəlilov, Əməkdar məşqçi Xanağa Quliyev, Azərbaycan İdman Jurnalistləri Assosiasiyasının üzvü Akif Ağayev və başqaları son illər idmançılarımızın əldə etdikləri nailiyyətlər, xüsusilə cüdoçularımızın uğurlarından bəhs ediblər. 

Diqqətə çatdırılıb ki, bu il respublikamızın yeniyetmələrdən ibarət cüdo üzrə yığması Avropa Gənclərin Olimpiya Festivalında, Avropa və Dünya çempionatında və digər mötəbər yarışlarda uğurlu nəticə əldə edərək, ilin ən güclü yeniyetmə cüdo komandası statusunu möhkəmləndirib. Zaqrebdəki Dünya çempionatı cüdo tariximizə yazılacaq bir çox əlamətdar nəticələrlə yadda qalıb. Belə ki, oğlanlar arasında son onillikdə Dünya çempionatından ilk qızıl medalı qazanılıb. İlk dəfə iki Azərbaycan idmançısı Nihad Məmişov (-50 kq. qızıl medal) və Məhəmməd Məmişov (gümüş medal) final görüşündə üz-üzə gəlib və bu görüş Azərbaycan cüdoçuları arasında peşəkarlığı nümayiş etdirib. Fərdi yarışlarda Azərbaycan yığması medal əyarına görə, ümumi hesabda və oğlanlar arasında 1-ci yeri tutub. Bu, Azərbaycan yığmasının indiyə qədər iştirak etdiyi bütün Dünya çempionatlarında həm medalların sayına, həm də əyarına görə əldə etdiyi ən yaxşı nəticədir. Sevindirici haldır ki, Məhəmməd Məmişov dünya reytinq cədvəlində öz həmkarları arasında 790 xalla birinci pillədədir. İnanırıq ki, Məhəmməd 2028-ci ildə keçiriləcək Olimpiya Oyunlarında ümidlərimizi doğruldacaq...

Keçirdiyi yarışlar barədə təəssüratlarını bölüşən Məhəmməd Məmişov qeyd edib ki, hər dəfə fəxri kürsüyə qalxanda, bayrağımızı zirvədə görəndə, himnimiz səslənəndə mənən güclənir, bu duyğusal anlarda özümü dünyanın ən xoşbəxti sanıram... 

Qeyd edək ki, Məhəmməd öncəki illərdə, tətil günləri ərəfəsində Masallıya gələndə Əməkdar məşqçi Xanağa Quliyevin məşq keçdiyi cüdo zalına baş çəkir, yeniyetmə həmkarları ilə özünəməxsus taktika və fəndləri bölüşür. O, bu dəfə də adətinə sadiq qalıb... 

Sonda yeniyetmə çempionumuza gələcək yarışlarda və təhsilində uğurlar arzulanıb.

Əlavə edək ki, həmin gün Masallı Rayon İcra Hakimiyyətinin başçısı Araz Əhmədovun qalib idmançımızla görüşüb.

Məlumat üçün bildirək ki, Məhəmməd Asif oğlu  Məmişov əslən Masallı rayonunun Təzə Alvadı kəndindəndir. 25 aprel 2006-cı ildə Bakıda anadan olub. Nizami rayonundakı Namiq Həmzəyev adına 238 nömrəli tam orta məktəbi bitirib. Azərbaycan Dövlət Bədən Tərbiyəsi və İdman Akademiyasının tələbəsidir.

Məhəmməd həm ölkə, həm də beynəlxalq səviyyəli yarışlarda yüksək nailiyyətlər əldə edib. 2018-ci ildə Gürcüstanda keçirilən beynəlxalq turnirdə 30 kiloqram çəki dərəcəsində, 2020-ci ilin yanvar ayında 15 yaşadək cüdoçular arasında keçirilən Bakı şəhər birinciliyində 42 kiloqram dərəcəsində birinci yerə layiq görülüb.

2021-ci ilin dekabrında Bakı klubları arasında yeniyetmələrin (U-18) Azərbaycan Cüdo Federasiyası Kuboku yarışında  50 kiloqram çəki dərəcəsində gümüş mükafata sahib olub.

2022-ci il Məhəmməd üçün daha uğurlu olub, desək yanılmarıq. Azərbaycan birinciliyinin qalibi olduqdan sonra yeniyetmə cüdoçulardan ibarət ölkə yığmasına cəlb edilib. Türkiyədə, Gürcüstanda, Rusiyada, ayrı-ayrı ölkələrdə təşkil olunan beynəlxalq yarışlardan Vətənə qızıl və gümüş medallarla dönüb. İspaniyanın Malaqa şəhərində yeniyetmələr arasında keçirilən açıq Avropa turnirində Məhəmməd Məmişov (50 kq) bütün rəqiblərini məğlub edərək fəxri kürsünün ən yüksək pilləsində yer alıb. Fransanın Strasburq şəhərində kadetlər arasında Avropa kuboku yarışında bürünc, may ayında isə Rumıniyanın paytaxtı Buxarest şəhərində yeniyetmələr arasında Avropa kuboku yarışında gümüş medala sahib olub. Xorvatiyanın Poreç şəhərində yeniyetmə idmançılar arasında keçirilən Avropa çempionatında bürünc medal qazanıb. Qitə çempionatında üçüncü yer uğrunda görüşdə ermənistanlı Qor Safaryanı üstələyən Məmişov rəqibini 25 saniyəyə məğlubiyyətə uğradıb. 

Bu il isə Məhəmməd daha uğurlu nəticələrə imza atıb. Portuqaliyanın Odivelas şəhərində cüdo üzrə yeniyetmələr arasında Avropa çempionatının (22-25 iyun, 2023) qızıl, Xorvatiyanın paytaxtı Zaqreb şəhərində dünya çempionatının (23-27 avqust) gümüş medalını qazanıb...