Qadın Kooperativləri arasında mübadilə görüşü baş tutub
21-08-2023, 16:31. Разместил: admin44
Azərbaycan Kənd Qadınları Assosiasiyası (AKQA) Qadın Kooperativləri arasında mübadilə görüşü keçirib.
Assosiasiyanın rəhbəri Gülbəniz Qənbərova bildirib ki, Ağdam, Masallı, Lənkəran, Zaqatala və Bərdə rayonunda fəaliyyət göstərən “Şəfəq”, “Nərgiz” və “Fatimə” Qadın Kooperativləri və kooperativ olmağa hazırlaşan 7 Qadın İnkişaf və Müəssisə Qrupu nümayəndələri bir araya gələrək özlərinin təşkilatlanma və təsərrüfat təcrübələrini bölüşüblər, eyni zamanda, mövsümi məhsulların bazara çıxışındakı çətinlikləri müzakirə ediblər.
Qeyd olunub ki, Bərdə rayonunun Böyük Göyüşlü kəndində fəaliyyət göstərən “Fatimə” Qadın Kooperativi görüşə ev sahibliyi edib. Bu kooperativ əvvəllər qeyri-formal Qadın Qrupu kimi fəaliyyət göstərsə də, 2022-ci ildə hüquqi status əldə edərək İstehsal-İstehlak Qadın Kooperativi kimi fəaliyyətə başlayıb.
Görüşdə iştirak edən 20 fermer qadın “Fatimə” Qadın Kooperativinin tərəvəz tarlalarına da baş çəkib, yetişməkdə olan məhsulun vəziyyəti, təkrar əkinə hazırlanan sahələr, payızlıq soğan əkini ilə tanış olublar.
Qadın Kooperativləri arasında təcrübə mübadiləsi görüşləri davam edəcək və növbəti görüşün Zaqatala rayonunda keçirilməsi nəzərdə tutulub.
"Yeni həyat" qəzeti,
www.yeniheyet.az
Вернуться назад