Kənd qadınları qeyri-təsərrüfat bizneslərində də uğurludurlar
28-08-2023, 16:22. Разместил: admin44
2019-cu ildə Masallı rayonunun Hişkədərə kəndində Azərbaycan Kənd Qadınları Assosiasiyasının (AKQA) dəstəyi ilə yaradılan Qızyurdu Qadın İnkişaf və Müəssisə Qrupunun əsas fəaliyyəti baramaçılıq, şirniyyat və tikiş olsa da, hazırda qrup əsas diqqəti tikiş sahəsinə ayırıb. Bu il sentyabrın 28-də tikiş sexlərinin açılışı həyata keçiriləcək. Əvvəllər bələdiyyənin inzibati binasında fəaliyyət göstərən tikiş ustaları USAİD Özəl Sektorun İnkişafı Layihəsinin dəstəyi ilə yaradılmış və bütün zəruri tikiş avadanlıqları, elektrik generatoru və digər təchiz olunmuş tikiş sexində öz fəaliyyətlərini davam etdirəcəklər.
Bu barədə Azərbaycan Kənd Qadınları Assosiasiyasından bildirilib.
Qızyurdu Qadın İnkişaf və Müəssisə Qrupunun sədri Rəhilə Əhədova qeyd edib ki, tikiş fəaliyyətinə qrup üzvlərindən toplanmış 140 manatla başlanılıb.
“Evlərimizdən gətirdiyimiz köhnə tikiş maşınlarını bələdiyyənin ayırdığı kiçik otaqda quraşdırdıq. Hər dəfə satışdan gələn pula daha çox parça alıb daha çox yataq dəstləri, süfrələr, çay dəsmalları tikib satırdıq. Biz artıq rayon xəstəxanası, uşaq bağçaları, istirahət mərkəzləri və s. kimi müəssisələrdən böyük sifarişlər alır, müştəri məmnuniyyəti və bizə olan inamı əldə saxlamaq üçün mallarımızın keyfiyyətli olmasına çalışırıq”, - deyə o vurğulayıb.
"Yeni həyat" qəzeti,
www.yeniheyet.az
Вернуться назад