Heydər Əliyev siyasi kursunu davam etdirən Yeni Azərbaycan Partiyası
18-11-2023, 23:30. Разместил: admin44
Yeni Azərbaycan Partiyası Azərbaycan tarixinin son dərəcə ağır və keşməkeşli günlərində, ölkənin ciddi sınaqlara məruz qaldığı bir dövrdə Azərbaycan ziyalılarının təşəbbüsü və fəal iştirakı ilə yaranmışdır. 1992-ci ildə ölkədə yaranmış son dərəcə təhlükəli vəziyyəti nəzərə alaraq, Azərbaycanın taleyini düşünən, mütərəqqi ruhlu insanlar respublikanı böhrandan çıxara biləcək yeni bir partiya yaratmaq təşəbbüsü ilə çıxış etdilər və bu məqsədlə xalqın sınanmış lideri və peşəkar siyasətçi Heydər Əliyevin şəxsiyyəti ətrafında birləşdilər. Xalqın istəyini nəzərə alaraq Ulu Öndərə müraciət edən məşhur “91-lər”in cəsarətli addımları nəticəsində dağıdıcı proseslərin qarşısı alındı.Partiyanın təsis konfransı 21 noyabr 1992-ci il tarixində Naxçıvanda ölkəmizin bütün regionlarını təmsil edən və 550 nəfərdən ibarət olan təşəbbüs qrupunun iştirakı ilə keçirilmişdir. Təsis konfransı Yeni Azərbaycan Partiyasının yaradılması haqqında qərar, partiyanın Proqram və Nizamnaməsini qəbul etdi. Konfransda Heydər Əliyev yekdilliklə partiyanın Sədri seçildi. Habelə, partiyanın Siyasi Şurası, İdarə Heyəti və sədrin müavinləri seçildi. Beləliklə, müstəqil Azərbaycanın tarixində öz üzərinə böyük tarixi missiya götürən Yeni Azərbaycan Partiyası yarandı.
Ölkə Prezidenti cənab İlham Əliyev 2022-ci ilin 21 noyabr tarixində Yeni Azərbaycan Partiyasının yaradılmasının 30 illiyi münasibətilə keçirilən tədbirdə etdiyi çıxışında həmin dövrdə cərəyan edən hadisələrin əsaslı təhlilini verərək vurğulamışdır ki, Ulu Öndər Heydər Əliyevin sədrliyi ilə keçirilmiş Yeni Azərbaycan Partiyasının təsis konfransından sonra ölkəmizdə yeni siyasi qüvvə yarandı. Ümummilli Liderimizin ilk gündən rəhbərlik etdiyi Yeni Azərbaycan Partiyası qısa müddət ərzində cəmiyyətin aparıcı qüvvəsinə çevrildi. Ulu Öndər cəmiyyətimizin aparıcı siyasi qüvvəsi olan Yeni Azərbaycan Partiyasını qısa zamanda inkişaf etdirdi, özünün dediyi kimi “dünənin, bu günün və sabahın partiyası” səviyyəsinə yüksəltdi. YAP ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış etmişdir. Qısa müddət ərzində ümumxalq partiyasına çevrilmiş Yeni Azərbaycan Partiyası yarandıqdan bu günə qədər çox böyük, şərəfli və uğurlu yol keçmişdir.
YAP-ın təsis konfransından yeddi ay sonra, 1993-cü ilin iyun ayında Heydər Əliyev xalqın tələbi ilə Bakıya dəvət edildi və parlamentin sədri seçildi. Artıq oktyabr ayında isə Azərbaycan xalqı tarixi seçimini edərək, Ulu Öndər Heydər Əliyevi Ölkə Prezidenti vəzifəsinə seçdi. Öz çıxışında möhtərəm dövlət başçımızın da dediyi kimi, Heydər Əliyev hakimiyyətə gələnə qədər Azərbaycan artıq müstəqil dövlət idi, amma bu dövlətin hələ də Konstitusiyası yox idi. Yalnız 1993-cü ildən müstəqil Azərbaycanda dövlətçiliyin əsasları qoyuldu, dövlət təsisatları düzgün zəmində formalaşmağa başladı.
Ulu Öndər Heydər Əliyevin yaratdığı partiya ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış etmişdir. Bu gün də Heydər Əliyev siyasi xətti Prezident cənab İlham Əliyevin rəhbərliyi ilə ölkəmizi və xalqımızı qələbədən-qələbəyə, zəfərdən-zəfərə aparır. Yeni Azərbaycan Partiyasının 2005-ci il 26 mart tarixində keçirilmiş III qurultayında Partiyanın yeni sədri Azərbaycan Respublikasının Prezidenti cənab İlham Əliyev seçilmişdir. Bu gün YAP Azərbaycanda demokratik, hüquqi, dünyəvi dövlət və azad vətəndaş cəmiyyəti qurmaq məqsədi ilə irqindən, etnik mənsubiyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən asılı olmayaraq Azərbaycan vətəndaşlarını ümumi siyasi ideya və məqsəd ətrafında birləşdirən siyasi partiyadır.
Partiyanın VII qurultayı Azərbaycanın davamlı inkişafı və müasir dövrün çağırışları kontekstində partiyanın qarşısına yeni vəzifələri müəyyən edib. Cəmiyyətin və dövlətin müxtəlif sahələrini əhatə edən islahatların aparılmasında, yeni siyasi konfiqurasiyanın yaradılmasında və siyasi dialoqun dərinləşməsində yaxından iştirak etmək partiya üzvlərindən yüksək fəallıq tələb edir. YAP öz təşəbbüsləri sayəsində ölkəmizdə partiyalararası siyasi dialoqu stimullaşdırır. Siyasi dialoqun inkişafı dövlət siyasətinin prioritet fəaliyyət istiqamətlərindən biridir. VII qurultayda qəbul olunmuş qərarlar hakim partiyanın “iqtidar-xalq” modelinin real işə düşdüyünü, milli həmrəyliyin yeni inkişaf mərhələsinin başlandığını nümayiş etdirdi.
Azərbaycan xalqı 2003-cü ildə bir daha müdriklik göstərərək, cənab İlham Əliyevi Ölkə Prezidenti seçməklə Heydər Əliyev siyasətinə səs verdi. Həmin tarixi gündən keçən 20 il ərzində Ulu Öndərin bütün tapşırıqları, bütün tövsiyələri yerinə yetirildi. Heydər Əliyev siyasi irsinin ən layiqli davamçısı, Ölkə Prezidenti cənab İlham Əliyev Ulu Öndərin siyasi xəttini davam və inkişaf etdirərək güclü Azərbaycan dövləti qurdu. Əlbəttə ki, Qarabağ probleminin həlli Ulu Öndər Heydər Əliyevin ən vacib siyasi vəsiyyəti idi. Prezident seçkilərindən sonra ərazi bütövlüyümüzün bərpası birinci dərəcəli vəzifə kimi qarşıya məqsəd qoyuldu və bu vəzifə uğurla icra olundu. Cənab Prezident İlham Əliyev bu problemi hər zaman xüsusi diqqət mərkəzində saxladı. 17 il ərzində dövlətimizin başçısı Azərbaycanı əzm və iradə ilə bu hədəfə doğru apardı. Nəhayət, 2020-ci ildə Azərbaycan xalqı öz Prezidenti, öz Ali Baş Komandanı ətrafında bir yumruq kimi birləşdi və cəmi 44 gün ərzində tarixi ədaləti bərpa etdi, düşməni torpaqlarımızdan qovdu. Bununla da ölkəmizin həyatında tamamilə yeni bir dövr, tariximizin ən şərəfli dövrü başlandı.
Rusif Kərimov ,
Viləşçay Su Anbarı İstismarı İdarəsinin rəisi
"Yeni həyat" qəzeti,
www.yeniheyet.az
Вернуться назад