Birlik və həmrəyliyin zirvəsi
21-02-2024, 21:00. Разместил: admin44
Türkiyə və Azərbaycanın sülh, əmin-amanlıq içərisində olması hər şeydən öncə Prezident İlham Əliyev və Prezident Rəcəb Tayyib Ərdoğanın müstəsna liderlik keyfiyyətləri ilə bağlıdır. Azərbaycan və Türkiyə prezidentləri mühüm strateji qərarları ilə XXI əsrin ən yeni türk tarixinə öz möhürlərini vurmuş liderlərdir. Prezidentlərin səfərləri və bu səfərlər çərçivəsində ölkələrimizin qarşılıqlı maraqlarına uyğun olan məsələlərin müzakirə olunması, qərarlar qəbul edilməsi də Azərbaycan və Türkiyə kimi dost, qardaş ölkələrin təhlükəsizliyi və gələcək inkişafı baxımından mühüm əhəmiyyət kəsb edir. Bu görüşlərdə Azərbaycan və Türkiyənin yeni dünya düzənində oynayacağı mümkün rol koordinasiya edilir ki, bu da çoxqütblü dünya nizamında strateji müttəfiq olaraq ölkələrimizin yerinin müəyyən edilməsi baxımından böyük əhəmiyyətə malikdir. Ona görə də Azərbaycan Prezidentinin andiçmə mərasimindən sonra ilk rəsmi dövlət səfərini Türkiyəyə etməsi tamamilə təbiidir. Hər zaman bizimlə və haqq işimizə dəstək olan Türkiyə ən vacib günlərdə Azərbaycanın yanında olan qardaş dövlətdir. Azərbaycanla Türkiyə arasında siyasi və strateji münasibətlərlə yanaşı, son illər iqtisadi əməkdaşlığın daha da dərinləşməsi müşahidə olunur. Türkiyə Azərbaycanın ən böyük iqtisadi tərəfdaşlarındandır.
Ankarada Azərbaycan Respublikasının Prezidenti cənab İlham Əliyev mətbuata bəyanatında qeyd edərək demişdr:” 2020-ci ilin noyabr ayında İkinci Qarabağ savaşı başa çatanda Azərbaycan işğalda olan ərazisinin böyük hissəsini azad etmişdir və bütün 44 gün ərzində Türkiyə bizim yanımızda idi. Savaşın ilk saatlarında əziz Qardaşımın çox qəti və dəqiq açıqlamaları bir çoxları üçün ciddi mesaj idi və bir çoxlarını bu işə müdaxilə etməkdən kənarda saxladı. Azərbaycan tək deyil, Türkiyə Azərbaycanın yanındadır. Bu, siyasi və mənəvi dəstək bizə yetərli oldu və 30 il ərzində sülh vasitəsilə həll edə bilmədiyimiz tarixi məsələmizi biz savaş meydanında cəmi 44 gün ərzində həll etdik.Azərbaycan xalqı bu qardaşlıq dəstəyini heç vaxt unutmayacaq. Bu gün söhbət əsnasında mən demişdim ki, ondan əvvəl də Türkiyə-Azərbaycan əlaqələri qardaşlıq əlaqələri idi. Ancaq İkinci Qarabağ savaşından sonra bizə göstərilən dəstək bu əlaqələri yeni yüksək zirvəyə qaldırdı. Bu gün Müttəfiqlik Bəyannaməsini əsas götürərək biz bütün məsələlərdə bir yerdəyik, bir nöqtəyə vururuq. Biz öz gücümüzə güc qatırıq və təbii ki, Türk dünyasının birləşməsi, ortaq köklərə sahib olan xalqların bir arada olması Türk Dövlətləri Təşkilatının hər bir üzvünü gücləndirəcək. Bu gün bu məsələ ilə də bağlı geniş müzakirə aparılmışdır. Türk Dövlətləri Təşkilatının Şuşada keçiriləcək qeyri-rəsmi Zirvə görüşü hörmətli Prezidentin qeyd etdiyi kimi, bu ilin iyul ayında keçiriləcəkdir. Eyni zamanda, müşahidəçi statusunda olan Şimali Kipr Türk Cümhuriyyətinin Prezidenti də mənim dəvətimlə bu görüşdə iştirak edəcək və bu, bizim ümumi işimizə, Türk xalqlarının birliyi işinə növbəti güclü təkan verəcək.”
Onu da qeyd etmək lazımdır ki,dünyada regionumuzla bağlı məsələlərdə Azərbaycan və Türkiyə arasında koordinasiya olunmuş siyasət izlənməkdədir. Azərbaycan Prezidentinin səfəri iki ölkə arasında əlaqələrin daha da güclənməsinə xidmət edəcək.Türkiyə ilə Azərbaycan arasında müzakirə edilməli çoxlu sayda məsələlər var. Bu müzakirələr ölkələrimizin həmin məsələlərə münasibətdə koordinasiya olunmuş siyasət yürütməsi üçün çox əhəmiyyətlidir
Azərbaycan qardaş Türk dövlətləri ilə strateji münasibətləri daha da dərinləşdirir. Bu, daha güclü Türk dünyası deməkdir".Yaşasın Azərbaycan! Yaşasın Azərbaycan və Türkiyə qardaşlığı.
Tağıyeva Əntiqə,
Hişkədərə kənd sakini
"Yeni həyat" qəzeti,
www.yeniheyet.az
Вернуться назад