“Yeni həyat” sizin qəzetinizdir
10-09-2024, 10:47. Разместил: admin44
QƏZETƏ ABUNƏ MƏSƏLƏSİ...Bir vaxtlar həftədə üç dəfə 14-15 min tirajla çıxan, geniş oxucu kütləsi tərəfindən rəğbətlə qarşılanan, rayonun bütün sahələrini – kənd təsərrüfatını, sənayesini, təhsil, səhiyyə, idmanı, tikintisini mütəmadi işıqlandıran “Yeni həyat” (“Çağırış”) qəzeti indi tənəzzül dövrünü yaşayır. SSRİ Jurnalistlər İttifaqının “Qızıl qələm” mükafatına layiq görülən, dəfələrlə ittifaq qəzetlərində qabaqcıl informasiya vasitəsi kimi adı çəkilən, müstəqillik illərində də uğurlarını əldən verməyən bu mətbu vasitəsinin dərd-sərləri niyə artıb? Bu suala cavab tapmaq həm asandır, həm də çətin. Düzdür hiss edirik ki, gənclərin qəzet, jurnal və kitaba marağı azalıb. İndi onları yüngül əyləncəli məsələlər, görüntülər, kimisə təhqir edib cəmiyyətdə nüfuzdan salan, iftira dolu materiallar, xəbərlər daha çox maraqlandırır. Narkomaniya, alkoqolizm, boşanmalar, qumarbazlıq, ağvalideynlik, fırıldaqçılıq və s. əndazəyə gəlməyən hallardan baxəbər olmaq onlar üçün maraq kəsb etmir.
Ayda iki nömrəsi buraxılan qəzetimizin yolunu ancaq orta və yaşlı nəslin nümayəndələri gözləyirlər.
İnformasiya vasitəsi kimi xüsusilə məktəb direktorları və rayonumuzda yerləşən regional idarələrin rəhbərləri bu qəzetə abunə olmamaq üçün daha çox canfəşanlıq edirlər. Bir-iki il əvvəl qəzetimizə könüllü abunə yazılan telekom, səhiyyə obyektləri, məktəblər, Viləşçay dəryaçası, bəzi hüquq-mühafizə təşkilatları, rayon elektrik şəbəkəsi, kommunal xidməti müəssisəsi bu gün dəfələrlə etdiyimiz xahiş, minnətimizə əhəmiyyət vermir və bəziləri etik qaydalarını unudub çinovnuksayağı kobudluq da göstərirlər.
Qəzetimizdə qeybə çəkilən “Məhkəmə salonunda” və “Sakit, məhkəmə gedir” rubrikaları müntəzən gedirdi. Bu mövzuda cəmiyyəti maraqlandıran yazıları oxucularımız izləyir və yeri gələndə onları maraqlandıran qeydləri də bizə göndərirdilər. Dövlət yol polisi də redaksiyamızla əlaqəni üzdü. Halbuki, rayonda bu sahədə baş verən qəzalar, yol qaydalarını pozan sürücülər barəsində maraqlı faktlarla oxucular qəzetimiz vasitəsilə tanış olurdular.
Təvəzökarlıqdan uzaq olsa da qeyd etməliyik ki, “Yeni həyat” bu gün də rayon qəzetləri arasında nüfuzlu mətbuat vasitəsi kimi seçilir. Ölkənin bir çox rayonlarında qəzetlərin fəaliyyətinə xitam verilib. Ancaq kollektivimiz 92 yaşlı “Yeni həyat”ı yaşadır, ona yeni ruh verməyə çalışır. Bu uğurlarımıza görə biz ilk növbədə rayon rəhbərliyinə minnətdarıq. Qəzetimizi mütəmadi izləyən RİH başçısı Araz Əhmədov çox vaxt tövsiyələrini də əsirgəmir.
Qəzetimiz özünün təşkilatçılıq funksiyasına həmişə sadiqdir. İdarə və müəssisələrdəki bəzi biabırçılıq hallarına, rayonun adına xələl gətirməsinə görə, göz yumuruq və bu faktların aradan qaldırılması üçün bir çox idarə başbilənlərinə tövsiyələr də veririk.
Qəzet burada çalışan kollektivin şəxsi malı deyil. Bütün rayonun görən gözü, vuran əli, döyünən ürəyidir. Masallının salnaməsini yaradan bu mətbu orqanına hamı ziyalı gözü ilə baxmalı, xeyriyyəçilik nümunəsi göstərməlidir. Məktəb direktoru və bəzi müəssisə rəhbərləri rayonda hansı qəzetin çıxdığını bilmirsə onun ziyalılığı da sual altındadır.
Və ya regional idarələrin rəhbərləri hansı rayonda yerləşdiklərini yaddan çıxarmamalı, Masallının ictimai-siyasi həyatında mütəmadi iştirak etməlidirlər.
Unutmasınlar ki, rayonda əməkdar müəllimlərin, həkimlərin, ağsaqqal ziyalıların vəfat etdiklərini ilk dəfə biz oxuculara xəbər verir, nekroloqlarını onlara təqdim edirik.
Bəzi idarə və müəssisə rəhbərlərinin biganəliyi, soyuqqanlığı, işini bilməməsi səbəbindən qəzetimizdə həmin sahələrin işıqlandırılması da unudulub. Çünki bu müdirlər qəzetin müraciətlərinə əhəmiyyət vermir, müxtəlif bəhanələrlə yaxalarını kənara çəkirlər.
“Yeni həyat” rayonumuzun ictimai-siyasi qəzetidir. Onun daha maraqlı çıxması ziyalılarımızin bu qəzetə münasibətindən çox asılıdır. Gəlin yaxşı əməllərə rəvac verin, rəhmətlik Hacı Zeynalabdin Tağıyevin mətbu sözə verdiyi qiyməti, göstərdiyi xeyirxahlığı yada salın.
Hörmətli ziyalılar, əlinizi “Yeni həyat”ın əlindən üzməyin. Qəzetimizin rayonun tarixindən silinəsinə səbəbkar olmayın. Hər zaman yaşadanlardan olub “Yeni həyat”ın xeyir-duasını alın. “Yeni həyat”a nizamlı şəkildə abunə olanlara minnətdarlıq edir, bütün təklif, elan və təbriklərinizi işıqlandırmağa hazır olduğumuzu bildiririk.
“Yeni həyat”çılar.
"Yeni həyat" qəzeti,
www.yeniheyet.az
Вернуться назад