Masallının Çaxırlı kəndində 25 iyun 2025-ci il tarixdə səyyar qəbul
25 iyun 2025-ci il tarixdə rayonun Çaxırlı kəndində Masallı rayon İcra Hakimiyyətinin başçısı Araz Əhmədovun sakinlərlə növbəti səyyar görüş-qəbulu keçirilmişdir.
Masallı rayon İcra Hakimiyyətinin başçısı Araz Əhmədov səyyar görüş-qəbulunu açaraq ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı rayon İcra Hakimiyyəti başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Sənədlərlə və vətəndaşların müraciətləri ilə iş şöbəsinin müdiri Elvin Fəttayevə çıxış edərək ərazidə ötən qəbul zamanı 1 nəfər vətəndaş tərəfindən 1 məsələ qaldırıldığını və məsələ ilə bağlı işlərin davam etdirildiyini bildirmişdir.
Sonra Elvin Fəttayev ərazidə görülmüş işlər barədə məlumat verərək qeyd etmişdir ki, şəhid ailələri, imtiyazlı şəxslərə və yardıma ehtiyacı olan insanlara məişət, kommunal və digər problemlərinin həlli ilə bağlı köməklik göstərilmiş, Çaxırlı ərazisində 850 metr kənddaxili yol cari təmir olunmuş və 400 metr yol qreyderlə hamarlanmış, ərazidə 67 ədəd yararsız elektrik dirəyi yenisi ilə əvəz olunmuş, Çaxırlı ərazisində 8 abonentin fərdi yaşayış evi təbii qazla təmin olunmuş, ərazidə 100 metr məsafədə suaparıcı kanallar təmizlənmiş, GPON lahiyəsi üzrə “Aztelekom” İB, “CityNet” MMC və “SelNet” MMC şirkətləri tərəfindən ərazidə yeni internet xətti çəkilərək əhalinin istifadəsinə verilmişdir.
Şöbə müdiri daha sonra “Yaşıl dünya naminə həmrəylik ili” çərçivəsində 550 ədəd, “Konstitusiya və Suverenlik ili” çərçivəsində isə 350 ədəd olmaqla ümumilikdə 900 ədəd ağac əkilməsi, İmanlı kəndində şəhid Məhəmməd Vəliyevin qardaşına əkin sahəsinə elektrik sayğacının quraşdırılmasından ötrü 160 metr elektrik naqili verilməsi, Çaxırlı kəndində şəhid atası Nurəddin Bağırovun həyətinə 3 maşın torpaq tökülərək yayılması barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı qaldırılan məsələlərin qeydiyyata alınması və nəzarətdə saxlanılmasını təmin etmək məqsədi ilə tapşırıqlarını vermişdir.
Masallı rayon İcra Hakimiyyətinin başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
