Masallının Bədəlan ərazisinin Aşurlu kəndində 16 iyul 2025-ci il tarixdə səyyar qəbul
16 iyul 2025-ci il tarixdə rayonun Bədəlan ərazisinin Aşurlu kəndində Masallı Rayon İcra Hakimiyyətinin başçısı Araz Əhmədovun sakinlərlə növbəti səyyar görüş-qəbulu keçirilmişdir.
Masallı Rayon İcra Hakimiyyətinin başçısı Araz Əhmədov səyyar görüş-qəbulunu açaraq ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı Rayon İcra Hakimiyyəti başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Sənədlərlə və vətəndaşların müraciətləri ilə iş şöbəsinin müdiri Elvin Fəttayevə çıxış edərək ərazidə ötən qəbul zamanı 3 nəfər vətəndaş tərəfindən 3 məsələ qaldırıldığını, 1-nin müsbət həll olunduğunu və 2 məsələ ilə bağlı vətəndaşa qanunamüvafiq cavab verildiyini bildirmişdir.
Sonra Elvin Fəttayev ərazidə görülmüş işlər barədə məlumat verərək qeyd etmişdir ki, şəhid ailələri, imtiyazlı şəxslərə və yardıma ehtiyacı olan insanlara məişət, kommunal və digər problemlərinin həlli ilə bağlı köməklik göstərilmiş, Bədəlan ərazisində 30 km kənddaxili yola çınqıl döşənmiş və əlavə olaraq 5.5 km yol qreyderlə hamarlanmış, ərazidə 52 ədəd yararsız elektrik dirəyi yenisi ilə əvəz olunmuş, Aşurlu kəndində 350 metr məsafədə küçələr işıqlandırılmış, ərazidə 4 km məsafədə suaparıcı kanallar təmizlənmiş və suaparıcı kanalın keçidinə 6 ədəd 6 metrlik borular qoyulmuş, GPON lahiyəsi üzrə “Aztelekom” İB və “CityNet” MMC şirkəti tərəfindən ərazidə yeni internet xətti çəkilərək əhalinin istifadəsinə verilmişdir.
Şöbə müdiri daha sonra “Yaşıl dünya naminə həmrəylik ili” çərçivəsində 1000 ədəd, “Konstitusiya və Suverenlik ili” çərçivəsində isə 300 ədəd olmaqla ümumilikdə 1300 ədəd ağac əkilməsi, Dəmirçi kəndində uzunluğu 15 metr olan körpü inşa edilərək əhalinin istifadəsinə verilməsi, Aşurlu kəndində 60 ədəd məişət tullantıları qutusu yerləşdirilməsi və 10 ədəd qutu üçün dəmir konstruksiyalı qapalı yerin hazırlanması, Bədəlan kəndində mərasim evinin əsaslı təmir olunması, Dəmirçi kənd məscidinin cari təmir olunması, Çayqıraq kəndində kənddaxili yolun asfaltlanmaya hazırlanmasından ötrü 60 metr məsafədə hasarların sökülərək yolun genişləndirilməsi, ərazidə olan dövlət bayraqları və şəhid lövhələrinin yenilənməsi barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı qaldırılan məsələlərin qeydiyyata alınması və nəzarətdə saxlanılmasını təmin etmək məqsədi ilə tapşırıqlarını vermişdir.
Masallı rayon İcra Hakimiyyətinin başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
