Rusiyada Atropatena dövrünə aid küp qəbir haqqında məqalə çap olunub

AMEA-nın Arxeologiya, Etnoqrafiya və Antropologiya İnstitutunun aparıcı elmi işçiləri Anar Ağalarzadə və Dmitri Kiriçenko, Lənkəran Regional Elmi Mərkəzinin aparıcı elmi işçisi Samir Kərimovun həmmüəllifliyi ilə “Atropatenada sarmat-alan izləri. Əminli küp qəbrinin materialları əsasında” adlı məqalə Rusiyanın Krasnodar Dövlət Tarix-Arxeologiya Muzeyinin toplusunda işıq üzü görüb.

Bu barədə  AMEA-dan bildirilib. Məqalədə Masallı rayonunun Eminli kəndi ərazisində təsərrüfat işləri zamanı təsadüfən üzə çıxmış küp qəbirdən bəhs olunur. Tədqiqatlar Atropatena bölgəsində bir çox qəbir növlərinin və müxtəlif dəfn adətlərinin mövcud olduğunu təsdiq edir. Mövcud arxeoloji məlumata görə, Atropatena ərazisində yaşayan tayfalara aid müxtəlif dəfn adətlərini qeyd etmək olar. Belə ki, tarixi Atropatena bölgəsinə daxil olan ərazilərdə aşkar edilmiş müxtəlif tipli dəfnlər vaxtilə burada yaşamış tayfaların dəfn mərasiminin bir çox xüsusiyyətlərini üzə çıxarmağa imkan verir. Yerli və gəlmə tayfalara məxsus olan bu dəfn abidələri onların dini inanclarını özündə əks etdirir. Eyni zamanda, bu tip dəfnlər Atropatenanın Əhəmənilər, Parfiya və Roma dövlətləri ilə siyasi, mədəni və sosial-iqtisadi əlaqələrinin öyrənilməsində böyük əhəmiyyət kəsb edir.

Məqalədə, həmçinin qeyd olunur ki, bu dəfn abidəsində aşkar edilmiş sarmat tipli əşyalar və 1 ədəd Parfiya dövrü sikkəsi Atropatenanın siyasi və mədəni əlaqələri haqqında müəyyən informasiyalar verir.

Qeyd edək ki, məqalə müəllifləri Rusiyada “Qərbi Qafqaz mədəniyyətlər, xalqlar və sivilizasiyaların əlaqələri kontekstində” mövzusunda keçirilmiş beynəlxalq konfransda iştirak ediblər.


"Yeni həyat" qəzeti,
www.yeniheyet.azшаблоны для dle 11.2