Belə-belə işlər...

Müğənni mahnı oxuyar...
Həftəbecər verilişlərlə tamaşaçıda ikrah  hissi yaradan televiziya kanallarımız öz yolları ilə davam etməkdədir. Hansı kanala baxırsan şou, acı bağırsaq kimi uzanan teleseriallar, quş dili bilən  müğənnilər. Adamlara həyat dərsi öyrədənlər, elmin hər sahəsindən “baxəbər” olan müğənnilərə qulaq asanda “Qafqaz əsiri” rus filmi yada düşür. Hansı sənətdə işləməyi bacardığını soruşulanda Şurik cavab verir ki, mən.  Televiziya kanallarını özününküləşdirən  müğənnilər də tarixdən, ədəbiyyat, coğrafiya, riyaziyyat, həndəsə, lap fəlsəfədən də söhbət açılsa, sənə dərs demək bacarığını göstərirlər. Ailə qurmaq, övlad böyütmək, ailədaxili münasibətlərə nüfuz etmək, hər nədən söhbət getsə müğənnilərin fikri əsasdır. Ailə qurmayanlar qayınanaların əzazilliyindən, kişinin sifətlərindən alim kimi danışır. Və ya 5-6 ər dəyişən qadın müğənni cavanlara “öyüd-nəsihət” verir. Hər kim həyatı gördüyü kimi, başa düşdüyü  qədər dərk edir və fikirlərini bu səpkidə əsaslandırır. Biri deyir, qayınana gəlinini incidir, ona ev işlərini gördürür, hətta inək sağmağı, toyuq hini təmizləməyi  tələb edir.  Maraqlıdır. Məgər qayınana özü gəlin olanda bu işləri görməyib. Görüb. İndi də növbə gəlinindir.

Bəzi aparıcılar bu mövzudan danışanda şəhər həyatı ilə kənd həyatını eyniləşdirirlər. Şəhər ailəsinin öz qayğıları var. Kənd gəlininin öz həyatı.  Şəhər gəlininin işi bir-iki otaq daxilindədir.  Olsa-olsa ərinə nahar hazırlayar, gecədən qalmış bir-iki qabı yuyar, özünə bəzək-düzək verib ya işə gedər, ya da uşağı bağçaya aparar.  Başqa nə işi var ki?.. Kənd gəlininin işi başından aşır: Evdə səliqə-sahman yaradandan sonra aşağı düşür. Həyət-bacanı süpürüb təmizləyir, toyuq-cücəyə baxıb dənini verir, hini kürüyüb atır. Heyvan varsa yemin-suyun verir. Yenə qalxıb uşaqlara nahar hazırlayır. Pal-paltarı töküb yuyur. Bu işləri görən gəlinə guya zorakılıq edildiyi israrla qeyd edilir.

Yaxşı, ay mədəni xanım, özünüz deyin, bu işləri kim görməlidir? Özünüz qaz vurub qazan doldurursunuz, yüngül həyat keçirirsiniz  (əlbəttə, hamıya aid deyil). Ər məsuliyyəti, ailə təəssübkeşliyi bilmirsiniz. Belədə “sən ağa, mən ağa, inəkləri kim sağa” məsəli yada düşür. Gəlin bir tir altda yaşadığı, ahıl, ya da xəstə qayınana, qayınatasından xəbəri yoxsa, onların halını bilmirsə, vaxtında bir qurtum su vermirsə, Allaha nə cavab verəcək. İnsan ancaq  yeyib-içmək, geyinib-keçinmək, gəzmək üçün dünyaya gəlibsə, onda həyat bəsit, mənasız olar.  Onsuz da bu gün qayınanasından şikayətlənən gəlin sabah özü də qaynana olacaq. Onda körpü gedib çayın o üzündə qalacaq. Ay müğənni analar, həyatı dərk edin. Sizə dəxli olmayan işlərə baş qoşmayın. Gedin mahnınızı oxuyun, milyonluq villalarınızda bəzi işləri özünüz görün ki, həyatın əndişəsini qanasıniz. Bilin ki, hər sahənin öz biliciləri var. Yəqin ki, bir gün efirlərdə alimlərimiz də görünəcək, sözlərini, fikirlərini deyəcəklər. Onda siz də ancaq mahnı oxumaqla məşğul olacaqsınız. Sizləri verilişlərə dəvət edən telekanallara yəqin ki, funksiyalarını qandıran tapılar. Axı, televiziya xalqın tribunasıdır. Onun işi ancaq vurçatlasın verilişlərdən ibarət deyil.
 



HƏSƏNAĞA.шаблоны для dle 11.2