Beyləqanda şəhid Pərvin Əliyevin xatirəsinə həsr olunmuş futbol turniri

Beyləqanda şəhid Pərvin Əliyevin xatirəsinə həsr olunmuş futbol turniri Beyləqan rayonu Qəhrəmanlı qəsəbəsində Vətən müharibəsi şəhidi Pərvin Əliyevin ad günündə şəhidin xatirəsinə həsr olunmuş futbol turniri keçirilmişdir. Beyləqan Rayon İcra Hakimiyyətinin dəstəyi, Mil-Muğan Regional Gənclər və İdman İdarəsinin təşkilatçılığı, Əməkdar bədən tərbiyəsi və idman xadimi Rizvan Ələkbərovun və şəhid Pərvin Əliyevin valideynlərinin təşəbbüsü ilə keçirilən turnirdə Beyləqan Rayon İcra Hakimiyyətinin başçısı Əziz Əzizov və aparatı, Masallı Rayon İcra Hakimiyyəti Başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Nurlan Muradov, Mil-Muğan Regional Gənclər və İdman İdarəsinin rəisi Nadir Quliyev, Lənkəran-Astara Regional Gənclər və İdman İdarəsi, Masallı Gənclər və İdman idarəsinin rəisi Sabiq Cahangirov, Beyləqan rayon hüquq–mühafizə orqanlarının rəhbərləri, şəhid ailələri, müharibə iştirakçıları, müharibə əlilləri və ictimaiyyat nümayəndələri iştirak etmişlər. Eyni zamanda keçirilən turnirdə qonaq qismində Masallı rayon Qızılağac bələdiyyəsinin sədri Şamil Məmmədov, “Ərkivan-Transport” şirkətinin rəhbəri, sahibkar Abdulla Abdullayev və bir qrup Masallı sakini də iştirak etmişlər. 

Qəhrəmanlı qəsəbə stadionunda baş tutan turnirdə əvvəlcə Azərbaycan Respublikasının Dövlət Himni səsləndirilmiş, Azərbaycanın ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilmişdir. Vətən müharibəsi şəhidi Pərvin Əliyevin doğum günündə şəhidin xatirəsinə həsr olunan Beyləqanın “Mil” komandası ilə Masallının “Ərkivan Masallı” komandaları arasında futbol turniri komandaların bərabər hesabı ilə (1-1) başa çatmışdır. 

Turnirin sonunda təşkilatçılar və komanda üzvləri Beyləqan Rayon İcra Hakimiyyətinin başçısı Əziz Əzizov, hüquq mühafizə orqanları rəhbərləri, Masallı Gənclər və İdman idarəsinin rəisi Sabiq Cahangirov və “Ərkivan-Transport” şirkətinin rəhbəri, sahibkar Abdulla Abdullayev tərəfindən müxtəlif qiymətli hədiyyələr və diplomlarla mükafatlandırıldılar.

Tədbirin yekununda şəhid Pərvin Əliyevin məzarı ziyarət olunaraq önünə əklil və gül dəsətələri qoyularaq xatirəsi yad edildi