ŞƏHİDLƏR VƏTƏNİN ZƏFƏR RƏMZİDİR” – Masallıda anım tədbiri
- 28-01-2025, 17:24
- Maraqlı
- 0
- 188
Masallıda Birinci və İkinci Qarabağ müharibəsi şəhidlərinin xatirəsinin yad edilməsi məqsədilə “Şəhidlər vətənin zəfər rəmzidir” layihəsinin ilk tədbiri gerçəkləşib.
Rəhim Tağıyev adına Masallı Tarix-Diyarşünaslıq Muzeyi, Dövlət Rəsm Qalereyası və Masallı Dövlət Regional Kollecinin birgə təşkilatçılığı ilə keçirilən anım tədbirində şəhid ailələri, müharibə iştirakçıları, media və mədəniyyət işçiləri, kollecin müəllim və tələbələri iştirak ediblər.
Əvvəlcə Azərbaycanın müstəqilliyi, torpaqlarımızın bütövlüyü uğrunda canını fəda edən şəhidlərimizin əziz xatirəsi bir dəqiqəlik sükutla yad olunub.
Muzeyin direktoru, Əməkdar mədəniyyət işçisi Əntiqə Tağıyeva 30 il ərzində qəhrəman Azərbaycan övladlarının keçdiyi döyüş yolundan, bu müddətdə verdiyimiz itkilər və qazanılan qələbədən, tarixi ədalətin bərpasından bəhs edərək yanvar ayı ərzində şəhidlik zirvəsinə ucalmış 28 masallılı gəncin həyat salnaməsinə qısaca nəzər salıb.
Lənkəran-Astara Regional Mədəniyyət İdarəsinin Masallı rayonu üzrə nümayəndəsi Salman Yunusov, “Yeni həyat” qəzetinin əməkdaşı Akif Ağayev, Masallı Dövlət Regional Kollecinin müəllimi Lətafət Ağakişiyeva rəhbəri ətrafında sıx birləşən xalqın əzmindən, rəşadətli ordumuzun mərd, mətin döyüşçülərinin igidlik və şücaətindən, 44 günə əldə edilən şanlı zəfərimizin tarixi əhəmiyyətindən danışıb, əbədiyyətə qovuşan fədakar vətən oğullarının tanıdılması yönümündə bu cür layihələrin, maarifləndirici tədbirlərin önəmini diqqətə çatdırıblar.
Birinci Qarabağ müharibəsi şəhidi Xıdır Məmmədovun qardaşı Əliqulu Məmmədov, şəhid Tələt Əliquliyevin qardaşı Ələddin Əliquliyev və digər şəhid ailələrinin üzvləri onlara göstərilən doğma münasibətə, şəhid ailələri və müharibə iştirakçılarının sosial rifahının yaxşılaşdırılması istiqamətində görülən tədbirlərə görə Müzəffər Ali Baş Komandan, ölkə Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirib, şəhidlərimiz barədə xatirələrini bölüşüblər.
Akif VAQİFOĞLU
