“Son zəng” - Ərkivan qəsəbə 3 nömrəli tam orta məktəbində
İyunun 14-də ölkənin hər yerində olduğu kimi Masallı rayonunun ümumtəhsil məktəblərində də böyük təntənə ilə “Son zəng” tədbirləri qeyd olunub.
Rayonun 66 tam orta məktəbində son zəng çalınıb. Məlumat üçün bildirək ki, bu il rayon üzrə 1751 nəfər onbirinci, 2587 nəfər (92 məktəb üzrə) isə doqquzuncu sinifi bitirib.
Belə tədbirlərdən biri də Ərkivan qəsəbə 3 nömrəli tam orta məktəbində keçirilib.
Tədbir başlamazdan öncə Azərbaycan Respublikasının Dövlət Himni səslənib.
Sonra torpaqlarımızın bütövlüyü uğrunda şəhid olan qəhrəmanlarımızın xatirəsi bir dəqiqəlik sükutla yad olunub.
Məzunları bu xoş gün münasibətilə təbrik məktəbin direktor əvəzi Kamal Tarverdiyev, Masallı Rayon İcra Hakimiyyətinin məsul işçisi İbrahim Həsənov, məktəbin direktor müavinləri Bəsirə Cəlilova, Rəşad Abıyev, onbirincilərin sinif rəhbəri Subhan Şiriyev, müəllimlərdən Sucəddin Gülverdiyev, İmaməli Quliyev və başqaları Respublika Prezidentinin rəhbərliyilə inkişaf edən Azərbaycan dövlətinin məzunlar qarşısında geniş üfüqlər açıldığını vurğulayıb, onlara müstəqil həyat yolunda yüksəlişlər arzulayıblar.
Bildirilib ki, 442 şagirdin təhsil aldığı məktəb üzrə 38 nəfər onbirinci, 46 şagird isə doqquzuncu sinif üzrə məzun olur.
Müəllimləri qarşısında çıxış edən məzunlar onlara göstərilən qayğıya vətənə sədaqət nümayiş etdirməklə cavab verəcəklərini inamla ifadə ediblər.
Məktəb rəhbərliyi tərəfindən təhsildə fərqlənən müəllim və şagirdlərə fəxri fərmanlar təqdim edilib
Məzunlar və birincilər mahnılar oxuyub, şeirlər söyləyiblər.
Sonra “Son zəng” səslənib.
Akif AĞAYEV
“Yeni həyat” qəzeti
www.yeniheyet.az
