Masallıda “Məktəbəqədər təhsil” layihəsinin açılışı baş tutdu
- 23-04-2024, 23:30
- Təhsil
- 0
- 349
Elm və Təhsil Nazirliyinin “Alternativ məktəbəqədər təhsil xidmətlərinin təşkili” pilot qrant proqramının qalibi olan Şərəfə kənd Q.İsmayılov adına tam orta məktəbində 23.04.2024-cü il tarixində “Məktəbəqədər təhsil” layihəsinin açılışı həyata keçirildi. Tədbir Ulu Öndər Heydər Əliyevin və Vətən uğrunda şəhid olan qəhrəmanların əziz xatirəsi bir dəqiqəlik sükutla yad edilərək başlanıldı. Tədbiri giriş sözü ilə layihənin rəhbəri Rafət Şirəliyev açmış donor və layihənin məqsədləri haqqında məlumat verərək qeyd etmişdir ki, “Məktəbəqədər təhsil” layihəsi 6 aylıq proqram fəaliyyəti ilə Şərəfə kəndində yaşayan 3-5 yaşlı 20 nəfər azyaşlı uşağı əhatə edəcəkdir.
Daha sonra tədbirdə iştirak edən Masallı Rayon İcra Hakimiyyəti Başçısı aparatının İctimai-siyasi və humanitar məsələlər şöbəsinin baş məsləhətçisi Əlimərdan Abdullayev çıxış edərək, ölkə üzrə ilk dəfə təşkil olunan pilot layihənin qaliblərindən birinin məhz Masallıdan olması rayonun təhsil gücünün yüksək göstəricisi olduğunu qeyd etmişdir. Həmçinin Lənkəran-Astara Regional Təhsil İdarəsinin Masallı rayon sektorunun aparıcı məsləhətçisi Azər Eyvazov, Masallı RİHB-nın Şərəfə kənd İƏD üzrə nümayəndəsi Rəşad Dadaşov, Şərəfə kənd tam orta məktəbinin direktoru Gülcan Kərimova və digər qonaqlar çıxış edərək ölkəmizdə təhsil sahəsində görülən uğurlu fəaliyyətləri qeyd ediblər.
Həmçinin bu kimi layihələrin həm azyaşlı uşaqlara, həm də məktəblərdə və kəndlərdə təhsil səviyyəsinin yüksəlməsinə verəcəyi mühüm faydalardan ola biləcəyini qeyd ediblər. Daha sonra azyaşlı uşaqlar üçün formalaşdırılan otaqla tanışlıq həyata keçirilib, məktəbəqədər təlim prosesi yaxından izlənilib.
"Yeni həyat" qəzeti,
www.yeniheyet.az
