Masallılı yeniyetmənin ABŞ-dakı uğuru
- 11-01-2025, 15:03
- İdman
- 0
- 301
Həmyerlimiz Beynəlxalq Olimpiadada bürünc medal qazanıb
Azərbaycanlı məktəblilər ABŞ-ın Hyuston şəhərində “Global Olympiad Center”in təşkilatçılığı ilə keçirilən Fizika-Astronomiya və Təbiət Elmləri üzrə Beynəlxalq Kopernik Olimpiadasının 4 qızıl, 4 gümüş, 6 bürünc medalına, 3 fəxri fərmanına layiq görülüblər.
Rice Universitetində təşkil olunan final mərhələsində (5-10 yanvar) dünyanın müxtəlif ölkələrindən təxminən 300 şagird iştirak edib. Ümumilikdə final mərhələsində Azərbaycanı 18 məktəbli təmsil edib.
Masallı rayonunun Köhnə Alvadı kənd sakini, 14 yaşlı Üzeyir İsrafil oğlu İsrafilzadə olimpiadanın fizika və astronomiya fənləri üzrə bürünc medalını qazanıb. O, hazırda Bakıda yerləşən Fizika, Riyaziyyat və İnformatika Təmayüllü Liseyin səkkizinci sinfində təhsil alır.
Qeyd edək ki, olimpiada çərçivəsində Rice Universiteti ilə tanışlıqdan sonra Hyustonda yerləşən Natural Sciences Muzeyinə baş çəkən şagirdlər NASA-nın qabaqcıl tədqiqat və layihələri ilə yaxından tanış olublar.
Akif AĞAYEV
