Voleybol Federasiyasının prezidenti Masallı məktəblilərinin yarışlarını izləyib
27-12-2023, 09:37. Разместил: admin44
Masallı Rayon Uşaq-Gənclər İdman-Şahmat Məktəbinin və Lənkəran-Astara Regional Gənclər və İdman İdarəsinin Masallı rayonu üzrə sektorunun birgə təşkilatçılığı ilə 31 Dekabr – Dünya Azərbaycanlılarının Həmrəylik Gününə həsr olunmuş məktəblilər arasında voleybol turniri keçirilib.
Dekabrın 26-da Masallı Olimpiya İdman Kompleksində təşkil olunan yarışlar öncəsi Ulu öndər Heydər Əliyevin və torpaqlarımızın bütövlüyü uğrunda canlarını fəda edən Vətən övladlarının xatirəsi bir dəqiqəlik sükutla yad edilib.
İdman tədbirində iştirak edən Masallı Rayon İcra Hakimiyyətinin başçısı Araz Əhmədov, Dövlət Kömrük Komitəsinin sədri, Azərbaycan Voleybol Federasiyasının prezidenti Şahin Bağırov Masallı voleybol məktəbinin ölkə idmanına verdiyi töhfələri diqqətə çatdırıb, yeniyetmə idmançılara tövsiyələrini verib, məşqçi-müəllimlərə və yetirmələrinə uğurlar arzulayıblar.
Lənkəran-Astara Regional Gənclər və İdman İdarəsinin Masallı rayonu üzrə sektorunun müdiri Sabiq Cahangirov, Masallı Uşaq-Gənclər İdman-Şahmat Məktəbinin direktoru Əlifağa Yaqubov idmançıların yarışlarda əldə etdikləri nailiyyətlər barədə məlumat veriblər.
Bildirilib ki, yarışların keçirilməsində məqsəd Dünya Azərbaycanlılarının Həmrəylik Gününün mahiyyəti barədə məktəblilərin daha dolğun məlumatlandırılması, rayonda voleybol idman növünün kütləviliyinin artırılması, perspektivli idmançıların aşkarlanması, rayon yığma komandasına yeni üzvlərin cəlb edilməsi, sağlam həyat tərzinin təbliğidir.
Gərgin və maraqlı mübarizəs şəraitində keçən yarışların yekun nəticəsinə əsasən S.Vurğun adına Türkoba kənd tam orta məktəbin komandası birinci, E.Ağayev adına Hişkədərə kənd tam orta məktəbin komandası ikinci, C.Kazımov adına Qodman kənd tam orta məktəbin komandası isə üçüncü yerə sahib olub.
Qalib komandalara təşkilat komitəsinin müvafiq dərəcəli diplomları təqdim olunub.
Akif AĞAYEV
"Yeni həyat" qəzeti,
www.yeniheyet.az
Вернуться назад