Masallı pəhləvanı “Bəhreyn-2024” Gimnaziadasının gümüş mükafatçısıdır
- 1-11-2024, 15:53
- İdman
- 0
- 261
Bəhreyn Krallığının paytaxtı Manama şəhərində keçirilən Gimnaziada İdman Oyunlarında yunan-Roma güləşi idman növü üzrə çıxış edən Əmrah Əmrahov (55 kq) ikinci yerə layiq görülüb.
Yarım finalda U-17 Avropa və dünya çempionu Turan Daşdəmirova qalib gələrək finala yüksələn həmyerlimiz həlledici mərhələdə iranlı rəqibinə məğlub olaraq Gimnaziadanın gümüş medalını qazanıb.
Məlumat üçün bildirək ki, 2019-cu ildən etibarən Azərbaycan çempionatında, eləcə də beynəlxalq turnirlərdə müxtəlif dərəcəli mükafatlara layiq görülən Əmrah Əmrahov Xorvatiyanın Zaqreb şəhərində keçirilən yunan-Roma güləşi üzrə U-15 Avropa çempionatının (16-19 iyul, 2022) 44 kq çəki dərəcəsində bürünc, Serbiyanın Novi Sad şəhərində keçirilən güləş üzrə U-17 Avropa çempionatının (iyun, 2024) gümüş, cari ilin ilk mundialında – İordaniyanın Amman şəhərində keçirilən güləş üzrə U-17 dünya çempionatında (19-25 avqust) ölkə yığmasının üzvü (böyük məşqçi Taleh İsrafilov, məşqçilər Nazim Əhmədovla Rasim Ağayevin rəhbərliyilə) Ə.Əmrahov 48 kiloqram çəki dərəcəsində bürünc medala sahiblənib.
Qeyd edək ki, Əmrah Əmrahov Lənkəran-Astara Regional Gənclər və İdman İdarəsinin nəzdində Masallı Uşaq-Gənclər İdman Məktəbinin məşqçi-müəllimi Qismət Əkbərovun yetirməsidir.
Akif AĞAYEV
