“Ulu öndər Heydər Əliyevin Azərbaycan mətbuatında əvəzolunmaz əməyi" – Masallıda tədbir

21-07-2023, 17:21
Maraqlı

21 iyul 2023-cü il tarixdə Rəhim Tağıyev adına Masallı Tarix-Diyarşünaslıq Muzeyində 22 İyul - Milli Mətbuat və Jurnalistika Günü ilə əlaqədar “Ulu öndər Heydər Əliyevin Azərbaycan mətbuatında əvəzolunmaz əməyi" mövzusunda tədbir keçirilib.

Muzeyin və Masallı Mərkəzi Kitabxana Sisteminin təşkilatçılığı ilə düzənlənən dəyirmi masada jurnalistlər, ziyalılar, mədəniyyət işçiləri iştirak ediblər.
Əvvəlcə Ulu Öndər Heydər Əliyevin, şəhidlərimizin, dünyasını dəyişən jurnalistlərin xatirəsi bir dəqiqəlik sükutla yad olunub.

Tədbiri giriş sözü ilə açan muzeyin direktoru, Əməkdar mədəniyyət işçisi Əntiqə Tağıyeva qonaqları salamlayaraq KİV nümayəndələrini 22 iyul Milli Mətbuat Günü münasibətilə təbrik edib, onlara şərəfli və son dərəcə məsuliyyət tələb edən işlərində uğurlar arzulayıb.
Bildirilib ki, 148 il öncə Həsən bəy Zərdabinin açdığı cığırla Azərbaycan Milli Mətbuatının əsası qoyuldu. Əkinçi” qəzetinın işıq üzü görməsilə Azərbaycan jurnalistikası tarixə, mədəniyyətimizə öz əbədi möhürünü vurdu. Əsası Ulu Öndər Heydər Əliyev tərəfindən qoyulan siyasi kursun məntiqi nəticəsi kimi bu gün ölkədə azad, demokratik və güclü mətbuat var. Hazırda müstəqil mətbuatın formalaşması və inkişafına xidmət edən siyasət möhtərəm Prezidentimiz İlham Əliyev tərəfindən uğurla davam etdirilir.

“Azərbaycan Respublikası Müharibə, Əmək və Silahlı Qüvvələr” İctimai Birliyinin Masallı rayon təşkilatının sədri Məmmədağa Şiriyev mətbuatın inkişafına göstərilən dövlət qayğısından və Azərbaycanı dünyada söz, insan hüquqlarına hörmət edən ölkə kimi tanınmasında media nümayəndələrinin rolundan danışıb.

Veteran jurnalistlərdən «Tərəqqi» medallı Əyyub Mehdiyev, Əyyar Tahirov, Şahin Səmədli rayonun mətbuat tarixi, bir zamanlar fəaliyyət göstərmiş mətbuat orqanları, jurnalistlər haqqında danışıb, xatirələrini bölüşüblər.
Çıxışlarda Ümummilli Lider Heydər Əliyevin Azərbaycan jurnalistikasının inkişafında hər zaman xüsusi yeri olan şəxsiyyət kimi dəyərləndirilib, Ulu Öndərin cəmiyyətdə jurnalistlərə münasibətin formalaşmasında mühüm rol oynadığı nəzərə çatdırılıb.

“Yeni həyat” qəzetinin məsul katibi, Azərbaycan Jurnalistlər Birliyi Masallı rayon Təşkilatının sədri Həsənağa Əliyev, baş ədəbi işçisi Akif Ağayev təmsil etdikləri qəzetin tarixindən danışaraq rayonun ən uzunömürlü mətbu orqanı olan 91 yaşlı “Yeni həyat” qəzetinin bütün çətinliklərə baxmayaraq bu gün də nəşr edildiyini, istər çap, istərsə də elektron media vasitəsilə oxucuları xəbər və maraqlı məlumatlarla təmin etdiklərini vurğulayıblar.

”Asiya.az” xəbər portalının Baş redaktoru Cəfər Cəfərov ölkəmizdə media qurumları ilə işin peşəkar səviyyədə qurulduğunu diqqətə çatdırıb.

Masallı Dövlət Regional Kollecinin direktor müavini Dilarə Mürşüdova, kollecin tarix müəllimi, Azərbaycan Jurnalistlər Birliyinin üzvü Nazim Əliyev, Masallı Mərkəzi Kitabxana Sisteminin direktor əvəzi Zamin Məmmədov media mənsublarına fəaliyyətlərində, qələm sahibi olan hər kəsə görəcəkləri işlərdə uğurlar arzulayıblar.