Unudulmayan həmkarımız

Kim deyir ki, yaxşılar unudular. Onlar cismən olmasalar da qəlblərdə, düşüncələrdə yaşayırlar. Rəsul Rzayev kimi.

Dörd ildir üzünü görmür, səsini eşitmir, zarafatlarının, küsməyinin şahidi olmuruq. Bilmədik necə gəldi dünyaya, həyatı necə keçdi. Doymadıq ondan. Bu gün də onu görmək, şeirlərini, zarafatlarını  dinləmək ağrısı ilə yaşayırıq.

Yazırdı ki, əlimi qapıya  ata bilmirəm. Bu gün biz də onsuz əlimizi qapıya ata bilmirik. Otağa daxil olanda hüznlü bir sükut, üstündə  mənalı yazılarını ərsəyə gətirdiyi masa izləyir, qarşılayır bizi. İncə duyğulu şeirləri ilə ürəkləri fəth edirdin. İncə ruhun bu geniş dünyanın hər guşəsində gəzirdi. Vətənə, torpağa, təbiətə sevgin ali məfkurən idi. İkona önündə dayanan qadın gözəlliyi də səni düşündürürdü.

Şair, publisist kimi ərsəyə gətirdiyin kitabları otaqdakı rəflərdə görəndə istər-istəməz vərəqləməyə bilmirik. Buradakı onlarca kitabın redaktorudur Rəsul müəllim.

Aylar-illər ötdükcə Rəsul müəllim fiziki cəhətdən bizdən uzaqlaşsa da mənən, ruhən yaxınlaşır, doğmalaşır. Həmişə qoşa addımladığımız dayanacağa qədər olan yolu indi  səninlə bağlı xatirələrlə gedirəm. Beş dəqiqəlik yol bir günə dönür mənimçün. Sabaha qədər, deyib ayrılırdıq. Hələ də o sabahı gözləyirəm. Sən ki, dostluqda etibarlı, sözündə dürüst idin. Bəs niyə əhdə xilaf çıxdın, Rəsul.

Sənsiz “Yeni həyat” yenə oxucuların sevimlisidir. Fanatların qəzetin səhifələrində şeirlərini, ovqatlı yazılarını oxumağa tamarzıdırlar. Həkimlər, müəllimlər, əmək adamları haqqında yazdığın esselər, oçerklər bu gün də yaddaşlardadır.

Tədbirlərimizdə övladların mütəmadi iştirak edirlər. Sənin ətrini onlardan alırıq. Nə qədər ki, ömrümüz davam edir, sən qəlbimizdə yaşayacaqsan, dostumuz, həmkarımız, sirdaşımız Rəsul müəllim. Çünki dünyaya əlvida deməyə tələsdin, hələ tez idi. Rahat yat, duyğulu şair, böyük istedad sahibi, insanların dostu, dünya dəftərində düşməni olmayan  insan. Sənə əlvida deməyə dilim gəlmir, yenə dediyini təkrarlayıram: Sabaha qədər.

                     
                                           
 HƏSƏNAĞA.


"Yeni həyat" qəzeti,
www.yeniheyet.azшаблоны для dle 11.2