ALLAH RƏHMƏT ELƏSİN

Əfsər Əzizulla oğlu Məmmədov

Rayonumuzun pedaqoji ictimaiyyətinə itki üz vermişdir.
Gözəl insan, qabaqcıl təhsil işçisi, Azərbaycan Respublikasının Əməkdar müəllimi Əfsər Əzizulla oğlu Məmmədov 5 avqust 2024-cü il tarixində, ömrünün 88-ci pilləsində dünyasını dəyişmişdir.
Əfsər Əzizulla oğlu Məmmədov 1936-cı il noyabr ayının 10-da Masallı rayonunun Ərkivan kəndində anadan olmuşdur.
Orta təhsilini Bədirli kənd səkkizillik və Cəfər Cabbarlı adına Ərkivan kənd orta məktəbində alıb.

1955-ci ildə indiki Azərbaycan Dövlət Pedaqoji Universitetinin ümumi texniki fənnlər fakültəsinə (fizika ixtisası üzrə) daxil olub.
1960-cı ildə, ali məktəbi bitirdikdən sonra doğma rayona qayıdıb. İlk pedaqoji fəaliyyətə Yeddioymaq kənd tam orta məktəbində başlayıb.

Sonrakı yarım əsrdən artıq müəllimliyi Ərkivan qəsəbə 2 nömrəli tam orta məktəbində (Bədirli orta məktəbində) keçib. 1961-ci ildən 2013-cü ilə kimi bu təhsil ocağında fizika fənnini tədris edib. 2000-2003-cü illərdə məktəbin direktoru işləyib.

Əfsər Məmmədov 2008-ci ildə Azərbaycan Respublikasının Əməkdar müəllimi fəxri adına layiq görülüb. İşlədiyi müddətdə dəfələrlə müxtəlif mükafatlar, fəxri fərmanlarla təltif edilib. Ali kateqoriyalı müəllim idi.

Minlərlə şagirdin ömür yoluna çıraq tutmuş bu müqəddəs peşə sahibinin yetirmələri arasında elm sahəsində, ölkəmizin ictimai-siyasi həyatında çalışan adlı-sanlı ziyalılarımız çoxdur.

Əfsər müəllim nümunəvi ailə başçısı idi. O, bir oğul, dörd qız atası idi. Övladlarının hər biri ali təhsilli ailə sahibidir.
Təvəzökar insan, təcrübəli pedaqoq, üzündən təbəssüm əskik olmayan Əfsər Məmmədovun işıqlı xatirəsi onu tanıyanların qəlbində daim yaşayacaq.


шаблоны для dle 11.2