Allah rəhmət eləsin
- 4-10-2023, 13:36
- Maraqlı
- 0
- 2 276
Kamal Allahverən oğlu Tarverdiyev
Masallı rayonunun pedaqoji ictimaiyyətinə itki üz vermişdir. Humanist insan, gözəl pedaqoq, dövlətçiliyimizə sədaqətli, nümunəvi ailə başçısı Kamal Allahverən oğlu Tarverdiyev 66 yaşında vəfat etmişdir.
Kamal Allahverən oğlu Tarverdiyev 13 iyul 1957-ci ildə Masallı rayonunun Sığdaş kəndində anadan olmuşdur. 1974-cü ildə rayonun Böyük Kolatan kənd tam orta məktəbini,1979-cu ildə isə Azərbaycan Dövlət Pedaqoji Universitetinin riyaziyyat fakültəsini bitirmişdir. Təyinatla Masallı rayonuna göndərilən K.Tarverdiyev 1979-2001-ci illərdə Sığdaş kənd tam orta məktəbində ixtisası üzrə müəllim işləmişdir. 2001-2010-cu illərdə həmin məktəbdə direktor vəzifəsində fəaliyyət göstərmişdir. 2010-cu ildən Masallı Rayon Təhsil Şöbəsində müqavilə ilə, 2011-ci ildə Azərbaycan Respulikasının Prezidenti yanında Dövlət Qulluğu Məsələləri üzrə Komissiyanın keçirtdiyi test imtahanından və müsahibə mərhələsindən uğurla keçərək 2012-ci ilin dekabr ayından daimi Dövlət Qulluğuna qəbul edilmiş və 18 may 2022-ci ilədək Masallı rayon Təhsil Şöbəsində böyük məsləhətçi işləmişdir. 19 may 2022-ci il tarixdən ömrünün sonuncan Lənkəran-Astara Regional Təhsil İdarəsi Masallı rayonu üzrə Təhsil Sektorunda aparıcı məsləhətçi vəzifəsində işləyirdi.
Çalışdığı illər ərzində Kamal Tarverdiyev özünü qabaqcıl müəllim, təcrübəli məktəbşünas, yüksək təşkilatçılıq bacarığına malik idarəedici dövlət qulluqçusu kimi göstərmişdir. O,təhsilin keyfiyyət səviyyəsinin müəyyənləşdirilməsi üçün monitorinqlərin aparılması, nəticələrin təhlil edilməsi və təkliflərin hazırlanması, ümumi orta təhsilin təşkili və idarə olunmasının təkmilləşdirilməsi istiqamətində təhlillərin aparılması, tədris müəssisələrinin metodik təminatı maddi- texniki bazası ilə ehtiyacların müəyyən ediməsi və təkliflərin verilməsi baxımından zəngin təcrübəyə malik idi.
K.Tarverdiyev yaradıcı ziyalı idi. Azərbaycan müəllimlərinin XV qurultayına nümayəndə seçilmişdi. O, rayonun ictimai işlərində fəal iştirak edirdi. Masallı rayonu üzrə Təhsil Sektorunun yanında Təhsil Şurasının üzvü kimi Şura iclaslarındakı müzakirələrdə məzmunlu çıxışları, dəyərli təklif və məsləhətləri ilə qoyulan məsələlətin həllinə töhfələr verirdi.
K.Tarverdiyev 1979-cu ildə idmanın sərbəst güləş növü üzrə ustalığa namizəd normasını ödəmiş və Azərbaycan Dövlət Pedaqoji Universitetinin ictimai peşələr fakultəsinin “İdmanın sərbəst güləş” şöbəsinin bitirərək “məşqçi” ixtisası almışdı.
O, 2001-2010-cu illərdə YAP Sığdaş kənd ərazisi üzrə ilk partiya təşkilatının sədri olmuşdur.
K.Tarverdiyev həm də gözəl ailə başçısı, 4 övlad atası idi.
Onun təhsil sahəsindəki xidmətləri dövlət tərəfindən yüksək qiymətləndirilmiş, səmərəli fəaliyyətinə görə Masallı Rayon İcra Hakimiyyətinin, YAP Masallı rayon təşkilatının, Masallı rayon Təhsil Şöbəsinin fəxri fərmanları ilə, eləcə də 1986-cı ildə Azərbaycan SSR “Xalq Maarifi Əlaçısı” döş nişanı ilə təltif edilmişdir.
Gözəl insan, təcrübəli pedaqoq, vətənpərvər ziyalı Kamal Tarverdiyevin əziz xatirəsi onu tanıyanların qəlbində həmişə yaşayacaqdır.
"Yeni həyat" qəzeti,
www.yeniheyet.az
