“Yaşayan xatirələr” – Masallıda kitab təqdimatı

16-09-2024, 14:00
Maraqlı

Yazıçı-publisist Ələşrəf Niftiyevin 19 və 20-ci kitabları işıq üzü görüb

Masallıda Azərbaycan Yazıçıları və Jurnalistləri Birliklərinin üzvü, III dərəcəli “Vətənə xidmətə görə” ordenli Ələşrəf Niftiyevin “Yaşayan xatirələr” kitabının təqdimatı olub.

Rayon Mərkəzi Kitabxanasında keçirilən tədbirdə mədəniyyət işçiləri, yerli yazarlar, ictimaiyyət nümayəndələri iştirak ediblər.
Kitabxananın direktor əvəzi Zamin Məmmədov müəllifin ömür yoluna qısaca nəzər salıb, digər kitabları kimi yazarın növbəti kitablarının da oxucular tərəfindən rəğbətlə qarşılanacağına əminliyini bildirib.

Masallı Rayon Ağsaqqallar Şurasının sədri Ələşrəf Niftiyev haqqında dəyərli fikirlərini səsləndirən Əməkdar jurnalist Zakir Abbas onun tanınmış ictimai xadim kimi xidmətlərindən, cəmiyyətdəki nüfuzundan söhbət açıb, ağsaqqal yazarın müxtəlif ədəbi janrlardan istifadə etməklə sadə dildə qələmə aldığı əsərlərdə aktual mövzulara geniş yer verdiyini yüksək qiymətləndirib.

Publisistika ilə yanaşı elmi, pedaqoji, ictimai mövzularda yüzlərlə yazı və tərcümələrin müəllifi, “Qızıl qələm” və H.B.Zərdabi media mükafatları laureatı Ələşrəf Niftiyevin yaradıcılığının özünəməxsusluğundan söz salan tədqiqatçı-yazar Xodaşirin Cəbili, jurnalist-publisist Akif Ağayev, şair Meysəba Aslanova, Azərbaycan Jurnalistlər Birliyinin üzvü Əntiqə Tağıyeva dövlətçiliyimizin möhkəmlənməsi, eləcə də gənclərin Vətənə məhəbbət, milli-mənəvi dəyərlərimizə sədaqət ruhunda tərbiyəsi yönümündə əsərlərinin əhəmiyyətindən danışıblar.

Respublikanın “Fəxri ağsaqqalı”, 79 yaşlı ədibin yüksək insani keyfiyyətlərini dilə gətirən natiqlər qeyd ediblər ki, onun “Yaşayan xatirlələr” adlı 19 və 20-ci kitablarında öz xidmətləri ilə Masallı tarixini zənginləşdirən görkəmli şəxsiyyətlər haqqında xatirələr yer alıb, əsərlərinin əsas leytmotivini haqqa, ədalətə, xeyirxahlığa çağırış, tərbiyəvi və təbliğat xarakterli mövzular təşkil edir.

Tədbirin təşkilinə və yaradıcılığına göstərilən diqqətə görə minnətdarlıq edən Ələşrəf Niftiyev oxucuların suallarını cavablandırıb, əsərləri və gələcək yaradıcılıq planları barədə məlumat verib.

İştirakçılar müəllifi təbrik edib, ona cansağlığı, yaradıcılığında uğurlar arzulayıblar.