Masallıda yazıçı-publisistin yubileyi qeyd olunub

31-12-2024, 18:18
Maraqlı

Xodaşirin Cəbiyev (Cabbari) – 70

Masallıda yazıçı-publisist, jurnalist-araşdırmaçı Xodaşirin Cəbiyevin (Cabbari) anadan olmasının 70 illiyi ilə əlaqədar tədbir keçirilib.

Mərkəzi Kitabxanada təşkil edilən tədbirdə rayonun tanınmış ziyalıları, yaradıcı adamları, mədəniyyət işçiləri, ictimaiyyət nümayəndələri, gənclər iştirak ediblər.

Əvvəlcə Azərbaycanın müstəqilliyi, ərazi bütövlüyü uğrunda şəhid olan Vətən övladlarının və 25 dekabr 2024-cü il tarixdə aviaqəzada həlak olan sərnişinlərin əziz xatirəsi bir dəqiqəlik sükutla yad olunub.

Tədbiri giriş sözü ilə açan kitabxananın əməkdaşı Günay Xəlilova müəssisədə vaxtaşırı kitab təqdimatlarının, tanınmış ictimai xadim, ağsaqqal, şair və yazıçılarla görüşlər keçirildiyini diqqətə çatdırıb.

Filoloq, yazıçı-publisist, jurnalist-araşdırmaçı, provizor Xodaşirin Cəbiyevin Azərbaycan dili yaradıcılığının tədqiqatçısı Əlizaman Baxış bildirib ki, yubilyar ömrünün ən dəyərli illərini, keşməkeşli həyatını xalqın sağlamlığına və maariflənməsinə həsr edib. O, dərin zəkası və yaradıcılıq potensialı sayəsində mahir əczaçı və bacarıqlı həkimliyi ilə yanaşı, ədib, jurnalist-tədqiqatçı, tərcüməçi, musiqiçi, bəstəkar, kinossenarist, maarifçi və ictimai xadim kimi ictimaiyyət arasında böyük şöhrət qazanıb. Ali təhsilli tibb mütəxəssisi olan X.Cəbiyev elmi-nəzəri və praktiki əsaslarla əczaçılıq işinin Masallıda ilk təşkilatçısı və qurucusu olub. Həmçinin, yeni texnologiya əsasında, hazırlanması yalnız zavod şəraitində mümkün olan 100-dən artıq dərman preparatının aptek şəraitində hazırlanmasına nail olub.

Yazıçı-publisist, rayon Ağsaqqallar Şurasının sədri Ələşrəf Niftiyev vurğulayıb ki, Xodaşirin Cəbiyev malik olduğu ensiklopedik bilik, istedad və bacarığı ilə böyük uğurlar əldə edib, özünəməxsus müsbət keyfiyyətləri və nümunəvi həyat tərzi ilə insanların sevimlisinə çevrilib: “Nəsr və poeziya sahəsində qələmini sınamaqla yanaşı, elmi və bədii-publisistik əsərlərə müəlliflik edən X.Cəbiyevin ictimai-siyasi mövzularda, Masallının görkəmli şəxsiyyətləri barədə onlarla məqalə və müsahibəsi mətbuatda dərc olunub, haqqında kitablar və bədii əsərlər yazılıb. Masallının mədəniyyət, muğam və musiqi tarixi, Mirkazım Aslanlı-Sarəng yaradıcılığı haqqında qiymətli araşdırmalar aparıb.”

Filoloq, şərqşünas, professor İmamverdi Həmidov, Müharibə, “Yeni həyat” qəzetinin məsul katibi Həsənağa Əliyev, Əmək və Silahlı Qüvvələr Veteranları Təşkilatı rayon şöbəsinin sədr müavini Ədalət Hüseynov, “Dodo” qəzetinin baş redaktoru İradə Məlikova, Masallı Tarix-Diyarşünaslıq Muzeyinin direktoru Əntiqə Tağıyeva, şair Qədiməli Eloğlu, Camal Lalazoə, tanınmış həkim Ənvər Rüstəmov, mühəndis, hüquqşünas İntiqam İsayev, həkim-cərrah, şair Maarif Salayev, təqaüddə olan hidro-mühəndis, dövlət qulluğu veteranı Hüseynağa Heydərov, inşaatçı-mühəndis Nəriman Rəhimov və başqaları yubilyarı təbrik edərək zəngin karyerası və qiymətli araşdırmalarından söhbət açıb, daxili insani zənginliyi və mənəvi keyfiyyətlərilə əsl ziyalı və vətəndaş etalonu olduğunu vurğulayıb, ona yaradıcılıq uğurları arzulayblar.

Masallı Dövlət Regional Kollecinin tələbələri yubilyarın yaradıcılığını əks etdirən şeirlər söyləyiblər.

Yubilyar Xodaşirin Cəbiyev ömür yolu, peşə və yaradıcılıq fəaliyyəti ilə bağlı xatirələrini bölüşüb, tədbirin yüksək səviyyədə təşkilinə görə Masallı Rayon İcra Hakimiyyətinə, Lənkəran-Astara Regional Mədəniyyət İdarəsinə, xüsusilə kitabxananın rəhbərlik və kollektivinə minnətdarlığını bildirib.