Azərbaycanın xarici siyasətində Mərkəzi Asiya ölkələri, həmçinin Özbəkistan ilə münasibətlərin inkişafı mühüm yer tutur
24-08-2023, 15:48. Разместил: admin44
Uzun illər dünya dövlətləri ilə beynəlxalq siyasətdən bəhs olunarkən əsasən Qərb ölkələri diqqət çəkmişdir. Halbuki Asiya qitəsi geosiyasi əhəmiyyətinə görə daha mühüm yer tutur. Azərbaycan Respublikasının xarici siyasətində Asiya qitəsinin böyük və kiçik dövlətləri ilə ikitərəfli və çoxtərəfli əlaqələr , bu regionda yaradılmış müxtəlif sahələr üzrə fəaliyyət göstərən beynəlxalq və regional qurumlarla münasibətləri xüsusi bir istiqamət təşkil edir.
Asiya ölkələri dedikdə, xüsusilə Mərkəzi Asiya, türk dövlətləri ilə əməkdaşlıqda həmişə ölkəmiz fəallıq göstərmişdir. Azərbaycanın bu istiqamətdə gördüyü tədbirlər başqa ölkələri də əməkdaşlığa səsləmişdir.
Prezidentimiz İlham Əliyev demişdir: " Türk dövlətləri ilə əməkdaşlıq bizim üçün prioritet məsələlərdəndir". Hələ ulu öndər Heydər Əliyev öz hakimiyyəti illərində bu ölkələrə etdiyi səfərlərdə türk dövlətlərinin birliyi, həmrəyliyi məsələsini vacib saymış, Azərbaycan və Mərkəzi Asiya ölkələrinin əməkdaşlığının möhkəm təməlini qoymuşdur. Çünki Qazaxıstan,Özbəkistan, Türkmənistan və digər Mərkəzi Asiya xalqlarının dili, dini, adət-ənənə və mədəniyyəti bizə daha yaxın və oxşardır.
Hazırda bu yolu prezidentimiz İlham Əliyev uğurla davam etdirir. Mərkəzi Asiya ölkələri arasında Özbəkistan-Azərbaycan əlaqələrini xüsusilə qeyd etmək lazımdır. İki ölkə arasında ikitərəfli əlaqələrin təməli 1995-ci ildə qoyulmuşdur. Prezidentimiz İlham Əliyev çıxışlarının birində demişdir ki, bu iki ölkəni qədim tarix birləşdirir.İstər siyasi,istər mədəni, istərsə də iqtisadi baxımından hər iki ölkə üçün əlverişli addımlar atılmışdır. Bir çox ölkələrdə olduğu kimi Özbəkistanda da Azərbaycan səfirliyi fəaliyyət göstərir. Ölkələrimiz arasında səmimi dostluq münasibətləri var.
Özbəklər də Azərbaycan xalqını həmişə sevmiş, mədəniyyətinə ,ədəbiyyatına maraq göstərmişdir. Hazırda Özbəkistandakı Azərbaycan səfirliyinin nəzdində Heydər Əliyev Mərkəzinin fəaliyyət göstərməsi özbək xalqınıт türkün böyük oğluna olan böyük sevgi və hörmətinin bariz nümunəsidir. Özbəkistanda böyük şair dahi Nizaminin heykəli qoyulubsa, Bakıda da Əlişir Nəvainin heykəli ucaldılıb, əsərləri kütləvi tirajlarla çap edilib.Bununla yanaşı qardaş ölkənin elm,təhsil ocaqları ilə müqavilələr imzalanıb.
Azərbaycanla Ermənistan arasında olan münaqişədə Özbəkistan daim Azərbaycanı dəstəkləmiş, müharibədən sonrakı dönəmdə də quruculuq işlərində fəallıq göstərmişdir. Qürurvericidir ki,azad olunmuş Füzuli rayonunda Özbəkistan dövlətinin vəsaiti hesabına məktəb binası inşa edilməkdədir. Mirzə Uluqbəyin adını daşıyan bu məktəbdə artıq öz doğma yurd-yuvalarına qayıtmış Füzuli sakinlərinin övladları təhsil alacaq.
Özbəkistan Prezidentinin Azərbaycana dövlət səfəri çərçivəsində ən müxtəlif mövzularda ətraflı müzakirələr aparılmış, ölkələrimiz arasında artıq mövcud olan strateji münasibətlərin daha da inkişaf etməsinə böyük töhfələr verəcək sənədlər imzalanmışdır. Mətbuata verdiyi bəyanatında cənab Prezident İlham Əliyevin qeyd etdiyi kimi, ölkələrimiz arasında ikitərəfli münasibətlərin inkişafına Azərbaycanda dövlət səviyyəsində daim xüsusi diqqət verilir. Həmçinin dövlətimizin başçısı vurğuladı ki, bu səfər iki ölkə arasında münasibətlərin gələcək inkişafı üçün yeni perspektivlər açacaq. Cənab Prezident həm də əmin olduğunu bildirdi ki, bir müddət əvvəl 500 milyon dollar nizamnamə kapitalı ilə yaradılan Birgə İnvestisiya Fondu bu məbləği çox sürətlə sərf edəcək və onu artırmaq lazım olacaq.
Bundan başqa cənab Prezident İlham Əliyev Azərbaycan ilə Özbəkistan arasında Ali Dövlətlərarası Şuranın yaradılması barədə imzalanmış müqavilənin önəmini xüsusi vurğulayaraq bildirdi ki, bu sənəd ölkələrimiz arasında münasibətlərin yüksək səviyyəsinin və gündəliyin kifayət qədər geniş olmasının göstəricisi kimi qiymətləndirilməlidir. Eyni zamanda bu sənəd çox qlobal xarakter daşıyır və mahiyyət etibarı ilə gələcək fəaliyyətimizin yol xəritəsi olmaqla, özündə həyat fəaliyyətinin müxtəlif istiqamətləri üzrə konkret hədəfləri əks etdirir.
Bütün bunlar onu göstərir ki ,bu iki ölkə arasında olan münasibətlər yüksək səviyyədədir. İnkişaf etməkdə olan Azərbaycan nəinki Özbəkistan, bütün onu dəstəkləyən ölkələrlə qardaşlıq münasibətlərini bu istiqamətdə davam edəcək.
Abbasova Sima,
Masallı rayonu Şatıroba kəndi
"Yeni həyat" qəzeti,
www.yeniheyet.az
Вернуться назад