Münasibətlərimizin gələcək inkişaf yolları müzakirə edildi və müəyyən olundu
25-08-2023, 15:51. Разместил: admin44
Avqustun 22-də Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev mətbuata bəyanatla çıxış ediblər.
Azərbaycan Respublikasının Prezidenti İlham Əliyev bəyanatla çıxış edərək Özbəkistan Respublikasının Prezidenti cənab Şavkat Mirziyoyevi salamlayıb, daha sonra onun yenidən Özbəkistan Respublikasına Prezident seçildiyi üçün məmnunluğunu bildirib, eyni zamanda qeyd edib ki, seçkilərdən sonra ilk dövlət səfərini Azərbaycana etdiyi üçün öz minnətdarlığını bildirib. Prezident İlham Əliyev qeyd edib ki, bu səfər bizim qardaşlığımızın,dostlugumuzun və Özbəkistan Presidentinin ölkəmizə olan münasibətindən irəli gəlir və biz bunu yüksək qiymətləndiririk.
Cənab Prezident çıxışı zamanı bildirib ki, ötən il o, dövlət səfəri və beynəlxalq tədbirlər çərçivəsində üç dəfə Özbəkistanda olub. Şavkat Mirziyoyevin həyata keçirdiyi islahatların , ölkəsi üçün etdiyi dəyişikliklərin nəticəsinin şahidi olub. Məhz bunlara görə özbək xalqı yenidən Şavkar Mirziyoyevə böyük etimad göstərərək onu yenidən ölkəyə prezident seçib.
Daha sonra cənab Prezident keçirilən görüş haqqında danışıb və bildirib ki, təkbətək və nümayəndə heyətlərinin iştirakı ilə görüşlər çərçivəsində qarşılıqlı fəaliyyətimizin möhkəmləndirilməsi istiqamətində bütün nailiyyətlər ətraflı təhlil edilib, eləcə də bütün sahələrdə-beynəlxalq platformalarda birgə fəaliyyətdən, beynəlxalq təşkilatlarda üzvlük çərçivəsində qarşılıqlı fəaliyyətimizin möhkəmləndirilməsindən başlayaraq, energetika, nəqliyyat, qarşılıqlı iqtisadi fəaliyyət, humanitar məsələlərədək münasibətlərimizin gələcək inkişaf yolları müzakirə edildi və müəyyən olundu.
Cənab Prezident qeyd edib ki, imzalanan sənədlərdən biri Ali Dövlətlərarası Şuranın yaradılması barədə müqavilədir.Bu, ölkələrimiz arasında münasibətlərin yüksək səviyyəsinin, qardaşlıq münasibətlərinin geniş olmasının göstəricisidir.
Prezident İlham Əliyev Azərbaycanda Özbəkistanın Mədəniyyət Günləri ilə bağlı uğurlardan da danışıb və bildirib ki, belə tədbirlərin müntəzəm keçirilməsi məqsədəuyğundur.
Daha sonra cənab Prezident Şavkat Mirziyoyevin şəxsi təşəbbüsü ilə Azərbaycana bağışladığı məktəbin açılışında iştirakından da danışıb.Cənab Prezident bildirib ki, bu Qarabağın bərpası işində ilk xarici dövlətin hədiyyəsidir .Biz bunu yüksək qiymətləndiririk.
Sonda cənab Prezident qeyd edib ki, Azərbaycan və Özbəkistan ictimaiyyəti bugünki danışıqların nəticəsini həm Azərbaycanda, həm də Özbəkistanda layihələrin praktiki icrasında görəcəklər.
Bütün bunlar yenə də ondan xəbər verir ki, biz doğru yoldayıq, prezidentlərin qarşıya qoyduqları vəzifələr yerinə yetirilir.
Ş.Xəlilova,
S.Xəlilov adına Qızılağac kənd 1 sayli tam orta məktəbin müəllimi
"Yeni həyat" qəzeti,
www.yeniheyet.az
Вернуться назад