Məqsədimiz ikitərəfli əməkdaşlığı dərinləşdirməkdir
9-05-2024, 22:30. Разместил: admin44
Mayın 8-də Azərbaycan Respublikasının Prezidenti İlham Əliyev və Bolqarıstan Respublikasının Prezidenti Rumen Radev mətbuata bəyanatlarla çıxış ediblər.
Əvvəlcə dövlətimizin başçısı mətbuata bəyanatla çıxış etdi.O, çıxışında ölkəmizə səfərə gələn dost Bolqarıstan
Respublikasının Prezidenti Rumen Radevi salamlayaraq, onun ölkəmizdə rəsmi səfərdə olduğundan məmnun olduğunu bildirib.
Dövlətimizin başçısı çıxışında bildirib ki, bu gün Bolqarıstan Respublikasının Prezidentinin Azərbaycana səfəri zamanı bir neçə önəmli sənədin , eyni zamanda, iki ölkə arasında təbii ki, strateji tərəfdaşlığın gücləndirilməsi haqqında Birgə Bəyannamənin imzalandığını xüsusilə qeyd etmişdir. Azərbaycan prezidenti çıxışında Bolqarıstan və Azərbaycanın 2015-ci ildən strateji tərəfdaş ölkələr olduğunu və bu illər ərzində əlaqələrimizin daha da sürətlə və uğurla inkişaf etdiyini,Bolqarıstan Prezidentinin budəfəki səfərinin bunun növbəti təzahürü olduğunu tədbir iştirakçılarının diqqətinə çatdırıb.
O, çıxışında Prezident Radevlə görüşlərinin müntəzəm xarakter daşıdığını, keçən il həm Prezident Radevin Azərbaycana, həm də özünün Bolqarıstana səfərlər etdiyini qeyd edib.”Eyni zamanda, keçən il biz Bolqarıstan-Serbiya sərhədində görüşmüşdük. Bir sözlə, fəal siyasi dialoq imkan verir ki, bütün istiqamətlər üzrə əlaqələrimiz genişlənsin, dərinləşsin və yeni nəticələr əldə edilsin”.
Dövlətimizin başçısı çıxışında son vaxtlar ticarət dövriyyəsinin iki ölkə arasında bir neçə dəfə artdığını qeyd etmişdir. Cənab İlham Əliyev çıxışında təkcə təbii qaz təchizatı sahəsində ildən-ilə Azərbaycan qazının Bolqarıstana ixracının artmaqda olduğunu ,keçən il 1 milyard 250 milyon kubmetr Azərbaycan qazının Bolqarıstan bazarına nəql edildiyini bildirib.
“Müqayisə üçün deyə bilərəm ki, 2022-ci ildə bu rəqəm cəmi 600 milyon kubmetr idi. Bizim hesablamalarımız onu göstərir ki, bu ilin sonuna qədər 1,5 milyard kubmetr Azərbaycan qazı Bolqarıstana ixrac ediləcək. Bu da Bolqarıstanın qaz istehlakının təqribən 50 faizini təşkil edir.
Yəni, bu gün Azərbaycan Avropa Komissiyasının dili ilə desək, Panavropa qaz təchizatçısı kimi fəaliyyətini Avropa məkanında genişləndirir və enerji təhlükəsizliyi məsələlərinin həlli üçün öz dəstəyini əsirgəmir”.
Azərbaycan Prezidenti çıxışında Bolqarıstanın ,eyni zamanda, qaz nəqli istiqamətində önəmli tranzit ölkəyə çevrildiyini ,hazırda Azərbaycan qazının Bolqarıstan ərazisindən digər qonşu ölkələrə ixrac edildiyini və gələcəkdə bu ölkələrin sayının daha da artacağını konfrans iştirakçılarının nəzərinə çatdırıb.
O,çıxışında Azərbaycanın tərəfdaş ölkələrlə, o cümlədən Bolqarıstanla bu istiqamətdə çox fəal iş apardığını bildirib. “ Beləliklə, Azərbaycan Avropa məkanı üçün təkcə neft-qaz təchizatçısı kimi deyil, eyni zamanda, yaşıl enerji təchizatçısı kimi özünü göstərəcək. Potensial kifayət qədər genişdir və biz bu barədə, eyni zamanda, ilin sonunda COP29 konfransında da danışacağıq. Mən Prezident Radevi bu tədbirdə iştirak etmək üçün Azərbaycana dəvət etmişəm”.
Dövlətimizin başçısı çıxışında Azərbaycanın sərmayəsi sayəsində bir neçə gün bundan əvvəl Bakı-Tbilisi-Qars dəmir yolunun modernləşdirilməsinin tam başa çatdığını bildirib.O, çıxışında Bakı-Tblisi-Qars dəmir yol xəttinin ötürmə qabiliyyətinin bir neçə dəfə artırıldığını vaxtilə Azərbaycan tərəfindən təşəbbüs kimi irəli sürülmüş, bu gün isə artıq imkanları genişləndirilmiş bu layihənin Orta Dəhlizin önəmli seqmenti kimi mühüm rol oynayacağını qeyd etmişdir.
Dövlətimizin başçısı çıxışında həm Şərq-Qərb istiqaməti və həm də əks istiqamət üzrə daha böyük həcmdə yüklərin daşınmasının bizim münasibətlərimizin daha da gücləndirəcəyini bildirmişdir.
Azərbaycan Prezidenti çıxışının sonunda demişdir:
“Bizim məqsədimiz ikitərəfli əməkdaşlığı dərinləşdirmək, yeni məzmunla zənginləşdirmək və strateji tərəfdaşlar kimi birgə səylər göstərməkdir”.
Ziyafəddin Cavadov,
Qızılağac kənd S.Xəlilov adına 1 nömrəli tam orta məktəbin müəllimi
"Yeni həyat" qəzeti,
www.yeniheyet.az
Вернуться назад