26 İyun Azərbaycan Respublikası Silahlı Qüvvələr Günüdür
22-06-2024, 21:30. Разместил: admin44
Fəxrimiz, qürurumuz, qəhrəmanız Azərbaycan ordusu. Bugün bəhsi keçdiyi yerdə qürurlandığımız Azərbaycan ordusunun ilkin qurulma dövrünü “Oyanış” adlandırmaq daha layiqli olar. 1918-ci il mayın 28-də bütün çətinliklərə rəğmən müstəqilliyini elan etmiş Azərbaycan Xalq Cümhuriyyəti dövründə Ordu quruculuğu yolunda atılan qətiyyətli bir çox addımlar elə əhəmiyyət kəsb edir ki, bu gün müzəffər ordumuzun qüdrəti o dönəmin izlərini özündə daşıyır. Təbii ki, məsələ tək bununla bitmirdi. Bu gün ordumuzun dünya orduları sırasında başı dik dayana bilməsi üçün o ənənəni layiqli davam etdirmək və daha da inkişaf etdirmək vacib idi. Xalq Cümhuriyyəti süqut etdikdən sonra ölkəmizdə ordu quruculuğu prosesi dayandı. Yalnız Ulu Öndər Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. Ümummilli Lider Heydər Əliyevin rəhbərliyi ilə ordu quruculuğu sahəsində aparılan işlər ölkəmizdə mütəşəkkil, qüdrətli ordu yaratmağa imkan verdi, onun gələcəkdə daha da möhkəmlənməsi üçün əsaslı zəmin yaratdı. Müstəqil Azərbaycan Respublikası ikinci dəfə azadlığını əldə edəndə hakimiyyətə xalqın səsi ilə gətirilən Ümummilli Lider Heydər Əliyev sarsılmaz ordu yaddaşımız, tariximiz üzərində daha möhkəm strukturlu ordu formalaşması yoluna çıxdı və bu əmanəti öz davamçısına Müzəffər Ali Baş Komandan cənab İlham Əliyevə ötürdü. O da öz növbəsində bu müqəddəs vəzifəni çiyinlərinə alaraq Vətən Müharibəsindəki Şanlı zəfərə qədər daşıdı.
26 iyun Silahlı Qüvvələr günün tarixi Əlahiddə Azərbaycan Korpusunun yaranmasına gedib çıxır. Əlahiddə Azərbaycan Korpusunun yarandığı o şanlı gün bu gündə ordumuzun bayramı kimi qeyd olunur. Xalq Cümhuriyyəti süqut etdikdən sonra ölkəmizdə ordu quruculuğu prosesi dayandı. Yalnız Ulu Öndər Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. 1994-cü il mayın 12-də Ermənistan-Azərbaycan hərbi münaqişəsində atəşkəs haqda müqavilə imzalandıqdan sonra Azərbaycan Milli Ordusunun formalaşması daha da sürətləndi. Həyata keçirilən uğurlu siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına və döyüş ruhunun yüksəldilməsinə xüsusi diqqət ayrıldı.
Müstəqillik illərində, ölkəmizin ən əmin-aman dönəmlərində belə ordu quruculuğu prosesi sürətlə davam etdirildi. Artıq biz tək deyilik, əməkdaşlarımız, tərəfdaşlarımız var. Silah sənayemiz və daxili ordu təminatımız ən yüksək səviyyəsindədir. 1990-cı illərin ortalarından başlayaraq Azərbaycanın NATO ilə sıx və səmərəli əməkdaşlığı ordu quruculuğu prosesinin təkmilləşdirilməsinə, Silahlı Qüvvələrimizin modernləşdirilməsinə, müasir standartlara uyğunlaşdırılmasına səbəb oldu. Bu gün ordumuzu yüksək səviyyəli ordu məmulatları, hərbi texniklarla təmin edən Müdafiə Sənayesi Nazirliyimiz var ki, xüsusi hazırlanan quruculuq planı sayəsində artıq 400-ə yaxın hərbi məmulat öz əl işimizdir. Bu cür nailiyyətlər Azərbaycana öz ordusunu zəruri silah, sursat və texnika ilə təchiz etmək üçün əvəzsiz imkanlar yaradıb. Milli Ordunun müdafiə qüdrətinin və döyüş qabiliyyətinin artırılması, maddi-texniki təchizatının yaxşılaşdırılması daim diqqət mərkəzindədir. Azərbaycan Ordusu artıq modern ordular sırasında, elit hərbi qüvvələr arasındadır. Bizim ordumuzun dünya hərbi sferasında elitar birlikləri, düşmənin ruhuna üşütmə salan xüsusi təyinatlı dəstələrə sahibdir. Bu gün “Amazon Pişikləri”, “Bordo Bereliler” kimi qorxulu yuxu kimi səslənən birliklər sırasında, “Yarasalar”, “Dəniz Pişikləri” var. Ölkəmizin son illərdə dinamik inkişafı silahlı qüvvələrin büdcəsinin artması və nəticə etibarilə ordumuzun güclənməsi ilə müşayiət olunması cənab Prezidentin Ordu quruculuğu ilə əlaqədar öz vədinə sadiq olduğunu təsdiq edir.
Azərbaycan Prezidenti, Ali Baş Komandan İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlmiş, maddi-texniki bazası əhəmiyyətli dərəcədə möhkəmləndirilmiş, hərbçilərin sosial vəziyyətinin yaxşılaşdırılması istiqamətində mühüm addımlar atılmışdır. Ordumuzdakı ən son yenilik isə, gücümüzə güc qatan, ordu sistemimizin yeni sütunu olan “Komando” birliklərinin yaranmasıdır. Vətən müharibəsində qazanılan Zəfər ordu quruculuğunda müəyyən islahatları şərtləndirdi. Azərbaycan Respublikası Prezidentinin tapşırığı ilə ordumuzda yeni təyinatlı Komando hərbi hissəsi yaradıldı. 2021-ci il 24 dekabr tarixində Müzəffər Ali Baş Komandan İlham Əliyev Xocavənd rayonunun Hadrut qəsəbəsində hərbi hissənin açılışında demişdir: “Komando Briqadasının yaradılması bizim üçün yenilikdir. Bir yox, iki yox, bir çox Komando briqadaları artıq Azərbaycanda yaradılır və bu briqadalar istənilən hərbi vəzifəni icra etməyə qadir olacaqlar. Yüksək təlim keçmiş, yüksək iradə nümayiş etdirmiş və Vətən uğrunda özlərini fəda etməyə hazır olan övladlarımız bu briqadalarda xidmət edəcəklər. Bu, bizim ordumuzun gücünü böyük dərəcədə artıracaq. Bir daha demək istəyirəm ki, belə briqadalar çox olacaq, minlərlə hərbçimiz bu briqadalarda xidmət edəcəklər. Beləliklə, Azərbaycan Ordusu bundan sonra da öz peşəkarlığını və yüksək mənəvi ruhunu qoruyacaqdır”.
Biz artıq sadəcə ölkəsini düşmənlərdən qoruyan bir ordudan danışmırıq. Biz bu gün Müzəffər bir Ordudan, qalib bir ordudan danışırıq. Düşmənin bizdən illər ərzində qopardığı vətən torpağını 44-cə günə həm də düşməni xəcil edə-edə geri qaytaran, düşmənin bağrını sökə-sökə azad edən ordudan danışırıq. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı qələbənin şahidi oldu. Füzuli, Hadrut, Cəbrayıl, Zəngilan, Qubadlı, Şuşa, Kəlbəcər, Ağdam, Laçın və adıçəkilən rayonların 300-dən çox yaşayış məntəqəsi azad edildi. Düşmənin kapitulyasiyası ordumuzun gücü hesabına əldə olunmuş nəticədir. 44 gün ərzində müntəzəm surətdə fərqli mənbələrdən və ünvanlardan müxtəlif təzyiqlər, təhdidlərin olmasına rəğmən Azərbaycan zəfər çaldı.
Müzəffər Ali Baş Komandan bununla tarixi ədaləti bərpa etdi. Təbii ki, belə bir ordunun heç bir mənsubu, xalqın, dövlətin diqqətindən kənarda qala bilməz. Prezident İlham Əliyevin təşəbbüsü ilə Vətən Müharibəsində qələbə münasibətilə Azərbaycan Respublikasının orden və medalları təsis edilmişdir. Həmin medal və ordenlərin təsis olunması qələbənin əbədiləşdirməsi və iştirakçılara ayrılan ali diqqətinin təcəssümüdür. “Zəfər” və “Qarabağ” ordenləri, həmçinin 15 yeni medal -“Vətən Müharibəsi Qəhrəmanı”, “Cəsur döyüşçü”, “Döyüşdə fərqlənməyə görə”, “Suqovuşanın azad olunmasına görə”, “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə”, “Zəngilanın azad olunmasına görə”, “Qubadlının azad olunmasına görə”, “Şuşanın azad olunmasına görə”, “Kəlbəcərin azad olunmasına görə”, “Ağdamın azad olunmasına görə”, “Laçının azad olunmasına görə”, “Vətən müharibəsi iştirakçısı” və “Vətən müharibəsində arxa cəbhədə xidmətlərə görə” təsis olunub. Bütün dünyanın da əzbərində olduğu kimi Azərbaycan Ordusu düşmənin başına öz “Dəmir Yumruğunu” qaldırdı. Və elə bir zərbə endirdi ki, o düşmən o başı bir daha qaldıra bilməyəcək. Elə bir yumruq endirdi ki, bu regionda bu torpaqlara göz qoyan hamıya görk oldu. Cənab Prezident bu orduya arxalanaraq ifadə etmişdi bu cümləni və mən bir daha fəxrlə bunu vurğulamaq istəyirəm ki: QARABAĞ AZƏRBAYCANDIR! Həm də bütöv Qarabağ, bütöv Azərbaycan.
Tural Sadıqov,
Masallı Gənclər evinin metodisti
Вернуться назад