Azərbaycan jurnalistikası növbəti inkişaf mərhələsini yaşayır
17-07-2024, 10:51. Разместил: admin44
Ümummilli Lider Heydər Əliyevin müstəqil Azərbaycana rəhbərliyi illərində həyata keçirdiyi çoxşaxəli islahatların və bu islahatların son 20 ildə Azərbaycan Prezidenti İlham Əliyev tərəfindən uğurla davam etdirilməsinin nəticəsi olaraq bu gün ölkəmizdə söz və mətbuat azadlığı sahəsindəki mövcud vəziyyət qabaqcıl demokratik ölkələrlə müqayisə edilə bilər.
Dövlətimizin başçısı respublikada mətbu nəşrlərin sərbəst fəaliyyətinə, jurnalistlərin öz iradələrini azad şəkildə ifadə etmələrinə bütün imkanların yaradılmasının tərəfdarıdır.
2005-ci, 2010-cu, 2015-ci və 2020-ci illərdə Azərbaycan milli mətbuatının yaranmasının 130, 135, 140 və 145 illik yubileylərinin dövlət səviyyəsində qeyd edilməsi, yubiley münasibətilə Azərbaycan mətbuat işçilərinin təltif edilməsi, fəxri adlar verilməsi, habelə kütləvi informasiya vasitələrinə maliyyə yardımının göstərilməsi jurnalistlərin əməyinə dövlətin yüksək qiymətinin təcəssümüdür. Ölkə rəhbərimizin 2008-ci il 31 iyul tarixli “Azərbaycan Respublikasında kütləvi informasiya vasitələrinə birdəfəlik maliyyə yardımı göstərilməsi haqqında”, eləcə də “Azərbaycan Respublikasında kütləvi informasiya vasitələrinin inkişafına dövlət dəstəyi konsepsiyasının təsdiq edilməsi haqqında” sərəncamları isə təsdiqləyir ki, mətbuata göstərilən dövlət qayğısı davamlı və sistemli səciyyə daşıyır. Dövlət başçısının 2009-cu il 3 aprel tarixli “Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması haqqında” Sərəncamı da məhz ölkəmizdə kütləvi informasiya vasitələrinin inkişafına dövlət dəstəyi konsepsiyasında əksini tapmış məsələlərin praktik surətdə gerçəkləşdirilməsi baxımından mühüm əhəmiyyət kəsb edib. Bütün bunları yüksək qiymətləndirən Azərbaycan mətbuatı Prezident İlham Əliyevi üçüncü dəfə “Jurnalistlərin dostu” elan etdi. “RUH” Jurnalistləri Müdafiə Komitəsi tərəfindən aparılan rəy sorğusunda Prezident İlham Əliyev ən yüksək səs çoxluğu ilə “Jurnalistlərin dostu” seçildi. Mükafatı qəbul edən Prezident İlham Əliyev ölkəmizdə mətbuatın inkişafı istiqamətində mühüm addımların atıldığını deyərək vurğulayıb ki, demokratik cəmiyyətin qurulması istiqamətində azad mətbuatın rolu danılmazdır.
Jurnalistlərlə görüşü zamanı Azərbaycan Prezidenti söyləyib ki, mən həmişə çalışmışam və çalışıram ki, jurnalistlərə öz dəstəyimi göstərim. Mənim jurnalistlərlə çoxsaylı görüşlərim, səmimi söhbətlərim bunu göstərir. Xüsusilə jurnalistlər üçün binaların tikilməsi də bu siyasətin bir təzahürüdür. Bu təşəbbüs bir neçə il bundan əvvəl irəli sürülmüşdü, jurnalistlər belə məsələ qaldırmışdılar, mən də buna müsbət reaksiya verdim və nəticə etibarilə artıq biz burada ikinci binanın açılışını qeyd edirik. Xatırlayıram, 4 il bundan əvvəl birinci binanın açılışında mən demişdim ki, yəqin gələcəkdə bu əraziyə “Jurnalistlər şəhərciyi” deyiləcək və bu, belə də oldu. Artıq bu gözəl yer “Jurnalistlər şəhərciyi”dir, burada üçüncü bina da tikiləcək. Əlbəttə ki, biz jurnalistlərin məişət problemlərinin həlli üçün gələcəkdə əlavə tədbirlər görəcəyik...
Ümummilli Lider Heydər Əliyevin inkişaf kursunu uğurla həyata keçirən ölkə Prezidenti cənab İlham Əliyevin yüksək qayğısı ilə sürətlə inkişaf edən rayonumuzun sosial-iqtisadi mənzərəsi, reallaşan irimiqyaslı layihələr, əhalinin rifah halının yaxşılaşdırılması sahəsində görülən işlər qəzetimizin aparıcı mövzusudur. Bu baxımdan əhalinin geniş təbəqəsi arasında “Yeni həyat” qəzetinin yayılmasının böyük ictimai-siyasi əhəmiyyəti vardır. Bu vəzifələr Dövlətə sədaqətlə xidmət etməkdən, peşə hazırlığını yüksəltməkdən, jurnalist adını uca tutmaqdan, ədalətli, şəffaflığı qorumaq kimi başa düşülməlidir. Əminəm ki, qələm yoldaşlarım bu missiyanı həyata keçirmək üçün səylərini birləşdirəcəklər.
Rayonun dinamik inkişafının getdikcə vüsət aldığı bir dövrdə görülən işləri, uğurları və problemləri qəzetimizin səhifələrində və eyni adlı «Yeni həyat» qəzeti saytında işıqlandırmağa, reklam və elanlarınızı dərc etməyə hazırıq. Biz Sizinlə qarşılıqlı əməkdaşlığımızın səmərəli olacağını, işgüzar əlaqələrimizin daha da möhkəmlənməsini arzu edirik.
Əlihüseyn ŞÜKÜROV,
Masallıda çıxan «Yeni həyat» qəzetinin və eyni adlı saytın Baş redaktoru.
Вернуться назад