SÖZDƏN ƏMƏLƏ KEÇMƏLİ
21-08-2024, 17:32. Разместил: admin44
Ətirlidir, gözəldir çayımız
Neçə illərin mənalı, ruh oxşayan bir mahnısında deyilir ki:
Bu dünyada səadətdir payımız
Ətirlidir, çox gözəldir çayımız.
Çayı yetişdirib ərsəyə gətirənlərə həsr edilən bu mahnı zəhməti gözəl nemətimizi, onun insan sağamlığına faydasını vəsf edir. Dünyanın demək olar ki, bütün ölkələrində sevilən bu içkiyə maraq hər vaxt önəmlidir. Ölkəmizdə isə purrəng çayın tayı-bərabəri yoxdur. Milli içkimiz, milli sərvətimiz həm də şöhrətimizdir. Bu şöhrəti həmişə qorumaq, artırmaq hər birimizin vətənpərvərlik borcudur.
İlin yazı, yayı çayın istehsal vaxtıdır. İl uzunu onu yetişdirənlərin qayğısına bələnən yaşıl kollar məhz bu vaxtlarda öz bəhrəsini verir. Rayonun bir neçə ərazisində yetişdirilən çay plantasiyaları əsrarəngiz gözəlliyi, heyranedici görüntüsü ilə valehedicidir. Xüsusilə Kolatanın Sığaçolə deyilən sahəsində çay cərgələri gözəlliyə gözəllik gətirir. Uca, yaşıl dağların arasındakı talalarda salınan plantasiyalar gözəl, təkrarsız gözəlliyə malikdir. Dərələrdəki sututarların qeyri-adi görüntüsü romantik əhval-ruhiyə yaradır. Xüsusilə məhsul yığımı günlərində qız-gəlinlərin zəhmətlə təmasda olması ürəkləri riqqətə gətirir. İllər keçdikcə Sığaçolənin plantasiyaları məhsulunu artırır. Şübhə yoxdur ki, yaxın illərdə burada min tondan çox yaşıl çay yarpağı istehsal ediləcəkdir.
Rayonun Mahmudavar, Tüklə, Kolatan ərazilərində də çayçılıqdakı işlər ilbəil yaxşılaşır. Düzdür, çayçılıq lazımi səviyyədə inkişaf etməsə də bu sahənin ümidverici olacağı yəqindir.
Rayonda bu sahəyə maraq göstərənlərlə həmsöhbət olanda çətinliklər qarşıya çıxır. Hər kəs bu çətinliklərə görə çayçılıqdakı ləngimələri sadalayır. Nəticədə torpağın şumlanması, üzvi və mineral gübrələrin vaxtında əldə edilməməsi, keyfiyyətli şitil yetişdirmək və ən başlıcası isə su məsələsi önə çəkilir. Yaşıl kollar susevər bitkidir. Ötən əsrdə rayondakı 3500 hektar çay plantasiyasında əsasən drenaj kanallarla, suvarma şəbəkələri ilə bu aqrotexniki tədbir həyata keçirilirdi. İslahat adı altında bu borular yerdən çıxarılıb satıldı. Bu qədər sahə məhv edildi. Ancaq texnologiyanın belə inkişaf etdiyi vaxtda 200 hektar sahənin suvarılması mümkün deyil.
Masallı kimi aqrar rayonda tərəvəzçilik, çayçılıq, üzümçülük, çəltikçilik, sitrusçuluq inkişaf etdirilməsə adamların maddi vəziyətinin yaxşılaşması çətin ki düzələ. Bir vaxtlar təsərrüfatın bu sahələri rayonun iqtisadiyyatına müsbət təsir göstərirdi. Mahmudavardakı “Baba bulağı” təbiət evində olanda gölün şimalındakı sahədə qız-gəlinlər çay yarpağı yığırdılar.
“Baba bulağı”nın aparıcı sahiblərindən olan Əfqan Babayevin sorağını burada aldıq. Məhsul yığımının ikinci mərhələsi idi. Yaşıl tarlada Əfqan Babayevlə görüşüb çay haqqında bəzi söhbətlər edirik. Kənddə böyük hörmətə malik bu insan təsərrüfatın hər sahəsində çalışıb. Neçə illər 7 minə yaxın əhalisi olan Mahmudavar bələdiyyəsinə də rəhbərlik edib. Kənddə bir sıra xeyriyyəçilik işlərinə imza atıb. Eyni zamanda “Baba bulağı” istirahət mərkəzinin qurulması və inkişafında böyük zəhməti olub.
Gördüyümüz bu gölün bəndə salınmasına, ətrafında yaşıllıqların yaradılmasına, hektarlarla meyvə bağının salınmasına nail olmuşuq. Bir vaxtlar bu yerlərdə sıralanmış yaşıl çay tarlaları bu gün də gözümün önündədir. – deyə MMS-nın icraçı direktoru Əfqan Babayev söhbətə körpü salır. – yenə də tarixi təkrarlayıb o gözəllikləri bərpa etmək istəyirik. Məqsədə əsasən çatmışıq.
“Baba bulağı” MMC – nin direktoru Zəmanə Babayeva – Cəfərzadə söhbət əsnasında qeyd edir ki, əmim Əfqanın işgüzarlığı, zəmətkeşliyi, təsərrüfatı yaxşı bilməsi sayəsində “Baba bulağı”nın uğurları ilbəil artır. Əvvəllər istirahət mərkəzi kimi fəaliyyətə başlayan mərkəzin ərazisi xeyli genişlənib. İndi 4 hektardan çox çay plantasiyamız var ki, 2 ildir məhsul yığılır. Elə bu il birinci yığımda 2,6 ton yaşıl yarpaq yığıb fabrikə yola salmışıq. Bundan başqa apelsin, mandarin bağları da məhsula düşüb. Bu il sitrus məhsullarımız daha çox olacaq.
Əfqan Babayev isə qeyd edir ki, təsərrüfatın başqa sahələrinə də nüfuz edirik. Bu il 22 hektar arpa əkmişik. Taxılçılıq heyvandarlığın inkişafına müsbət təsir göstərir. Axı kollektivimiz həm də heyvandarlıqla məşğuldur. 80 başa yaxın cavan heyvanı ətçilik istiqamətində yetişdiririk ki, istehsal etdiyimiz məhsul istirahət mərkəzinin yeməkxanasında istifadə olunur.
Söhbət zamanı aydın olur ki, MMC-də 40-dan çox gənc çalışır. Bu, kənddə gənclərin işlə təminatına böyük dəstəkdir.
Biz “Baba bulağın”nda olanda burada yenə də qızğın iş gedirdi. Çay, feyxoa, naringi, portağal sahələri suvarılır, ətrafında kol-koslar təmizlənir, səliqə-sahman yaradılırdı. Əfqan Babayev yenə də çay haqqında məlumat verib deyir ki, məqsədimiz plantasiyaları genişləndirməkdir. Çünki çay kəndimizin bir nömrəli sərvəti olub. İkinci ildir ki istehsal edilib Lənkərana emala göndərdiyimiz çaydan istirahət mərkəzində istifadə olunur və turistlər tərəfindən rəğbətlə qarşılanır.
...Çay Masallının əvəzedilməz neməti olub. İnanırıq ki, çox keçməz rayonda çayın əvvəlki şöhrəti bərpa olunacaq. Rayon statistika idərəsindən aldığımız rəqəmlər də bu uğurların dirçəlməsindən xəbər verir. Aldığımız məlumata görə indi rayonda 110 hektara yaxın çay plantasiyası mövcüddur. Birinci yığım zamanı bunun 50 hektarından 22.3 ton yaşıl çay yarpağı yığılıb emala göndərilmişdir.
HƏSƏNAĞA.
Вернуться назад