Bələdiyyə həyatı. Problemlər həll olunur
28-08-2024, 09:58. Разместил: admin44
Müsahibimiz Masallı şəhər bələdiyyəsinin sədri Azər Baxışovdur.
-Azər müəllim, xoş gördük. Şəhər bələdiyyəsinin fəaliyyəti haqqına qısaca məlumat verməyinizi xahiş edirik.
-Masallı şəhər bələdiyyəsi 13 nəfər üzv və 3 nəfər bələdiyyə qulluqçusundan ibarətdir. Masallı bələdiyyəsi 6 yaşayış məntəqəsini əhatə edir. Bələdiyyənin mülkiyyətində 219,96 hektar torpaq sahəsi və 52 hektar ümümü istifadədə olan örüş torpağı vardır. Ərazidə 26106 nəfər əhali yaşayır. Onların mülkiyyətində 335 hektar pay torpaq sahəsi və 1071 hektar yaşayış sahəsi olmaqla 5976 ədəd fərdi yaşayış evi və 1424 mənzil vardır.
Bildiyiniz kimi bələdiyyə qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti və yerli büdcəsi olur və o Azərbaycan Respublikasının Konstitusiyası ilə və bu qanunla səlahiyyətlərinə aid edilmiş yerli əhəmiyyətli məsələləri müstəqil surətdə həll edir.
-Bəs, bələdiyyə xərclərinizi necə müəyyənləşdirirsiniz?
-Bildirmək istəyirəm ki, bələdiyyə özünü idarəetmə orqanı olduğı üçün bələdiyyənin illik büdcəsi yerli gəlirlər hesabına təşkil olunur. Hal-hazırda bələdiyyənin gəlirlərini torpaq vergisi, əmlak vergisi və bələdiyyə torpaqlarının satışı və icarəsi hesabına təşkil edilir. Əmlak və torpaq vergilərinin hesablanması ilə bağlı yeni əmlakların qeydiyyatı aparılmış və BAMS proqramına işlənilmişdir. BAMS proqramından çıxarılan tədiyyə bildirişləri vətəndaşlara poçt vasitəsilə çatdırılmışdır. Hazırda vergilərin köçürülməsində qismən aktiv olan ərazilər əsasən Masallı şəhər, Digah, Dadva və İsgəndərli əraziləridir. Kosakül və Seybətin ərazilərində isə demək olar ki, bir neçə evi çıxmaqla qalan evlər vergi verməkdən yayınırlar. Vergidən yayınan vergi ödəyiciləri barəsində ilin sonunda qərar veriləcək və vergilərin ödətdirilməsi üçün Masallı rayon icra və probasiya şöbəsinə göndəriləcəkdir. Müasir dövrün tələblərini nəzərə alaraq bələdiyyə büdcəsinin təşkili ilə bağlı şəhər sakinlərindən bələdiyyəyə dəstək olmalarını xahiş edirəm. Vergilər sakinlər tərəfindən vaxtında ödənilsə ərazinin sosial-iqtisadi problemləri həll olunar.
-Azər müəllim, Masallıda vətəndaş qəbulu və onların müraciətləri daim diqqət mərkəzindədir. Siz bu məsələni necə təşkil edirsiniz?
-Masallı bələdiyyəsində vətəndaşların müraciətləri və qəbulu da daim diqqət mərkəzində saxlanılmışdır. Vətəndaşlar tərəfindən edilən müraciətlərə vaxtında baxılıb, lazımı tədbirlər görülür. Bəli, son illər problemlərin aradan qaldırılmasında irəliləyiş var. RİH başçısı cənab Araz Əhmədovla görüşlərimizdə bu təkliflər səslənəndə rayon rəhbəri irəli sürülən məsələləri diqqətdə saxlayır. Tövsiyələrini verir, kömək edəcəyini bildirir. Və onu da tapşırır ki, heç bir vətəndaş müraciəti diqqətdən kənarda qala bilməz.
-Masallıda qanunsuz tikililərə yol verilə bilməz. Bu məsələyə siz necə diqqət yetirirsiniz?
-Bələdiyyə ərazisində qanunsuz tikintilərin, qazıntıların, torpaq zəbtlərinin qarşısının alınması üçün mütəmadi olaraq monitorinqlər keçirilir və ərazi nəzarətdə saxlanılır.
-Masallı bələdiyyələri son illər fəallıq göstərirlər. Şəhər, qəsəbə və kənd bələdiyyələrinin yaxşı işini qəzet və saytlarımızda dərc edirik. Yaxşı olardı ki, siz də görülən işlər haqqında danışasınız.
-Ötən və cari dövrlər ərzində Masallı bələdiyyəsi tərəfindən şəhər daxili yollarda təmir işləri görülmüşdür. Belə ki, Masallı şəhərinin Rəşid Behbudov, Kazım Kazımzadə, Məmməd Rahim, Qasım bəy Zakir, Qurtuluş (döngə 1), Vüsal Hadıyev (döngə 1 və döngə 4), Musa Nağıyev, Süleyman Rəhimov, Cavanşir, Kərim Kərimov, Bəxtiyar Vahabzadə (döngə 1), Qasım bəy Zakir, Məmməd Araz, Mirzə Ələkbər Sabir, Ənvər Qasımzadə, Mirəli Seyidov, Abdulla Şaiq, Alı Mustafayev, Hacı Zeynalabdin Tağıyev (döngə 1), Əcəmi Naxçıvani, Əbdülvahab Salamzadə, Mustafa Topçubaşov, Salatın Əsgərova, Sübhan Həsənov küçələrinə çınqıl materialı tökülmüş və texnika vasitəsilə hamarlanmışdır. “Abad və təmiz qəbiristanlıq aylığı”nın keçirilməsi məqsədilə Masallı şəhər ərazisində yerləşən qəbiristanlıqlarda abadlıq və təmizlik işləri görülmüşdür. Masallı şəhər bələdiyyəsi 2024-cü ilin payış-qış mövsümü ilə əlaqədar şəhər ərazisində 15 küçənin təmir olunması nəzərdə tutulmuşdur. Qeyd etdiyimiz kimi bələdiyyənin şəhər abadlığı üçün geniş planları var. Həmin planlar bələdiyyə fəallarının təşəbbüskarlığı ilə həll olunur və olunacaq.
-Müsahibəyə görə sağ olun.
Müsahibəni apardı:
Ə.MƏMMƏDHÜSEYN
Вернуться назад