Təmiz dünya naminə
Dünən, 18:31. Разместил: admin44
Oktyabrın 16-da Masallı rayon Mərkəzi Kitabxanasında rayon Ağsaqqallar Şurası və kitabxananın birgə təşkilatçılığı ilə Bakı şəhərində keçiriləcək COP29 Beynəlxalq Forum hərəkatı ilə bağlı “Təmiz dünya naminə” adlı tədbir keçirilib.
Əvvəlcə Ulu Öndər Heydər Əliyevin və Azərbaycanın ərazi bütövlüyünün bərpası uğrunda canını fəda edən şəhidlərin xatirəsi bir dəqiqəlik sükutla yad edilib.
Tədbirdə ilk çıxış edən kitabxananın direktor əvəzi Zamin Məmmədov rəhbərlik etdiyi müəssisədə bir sıra qurumlarla birgə əməkdaşlıq şəraitində bir çox sahələrlə yanaşı, ekologiya mövzusuna həsr olunmuş tədbirlər keçirildiyini bildirib.COP29 Beynəlxalq iqlim dəyişikliyi konfransına ev sahibliyinin Azərbaycana həvalə olunmasının ölkəmizin beynəlxalq aləmdə yüksək nüfuza malik olmasının bariz göstəricisi olduğunu vurğulayıb.
Sonra rayon Ağsaqqallar Şurasının sədri Ələşrəf Niftiyev çıxışında ekoloji tarazlığın qorunmasının bəşəriyyətin təhlükəsizliyi baxımından böyük əhəmiyyət daşımasından, ekoloji böhranın aradan qaldırılması istiqamətində beynəxalq ictimaiyyətin səfərbər olmasının zəruriliyindən söhbət açıb.
Tədbirdə çıxış edənlər-Masallı MKTB-nin şöbə müdiri İslam Məmmədov,Əməkdar jurnalist Zakir Abbas, İntiqam Əsgərli adına şəhər 3 saylı orta məktəbin şagirdi Murad Quliyev, Ağsaqqallar Şurasının Ərkivan qəsəbəsi üzrə nümayəndəsi Mirəyyub Əliyev, Lənkəran-Astara Regional Gənclər və İdman İdarəsinin Masallı rayonu üzrə gənclər və idman sektorunun baş məsləhətçisi Oqtay Ağayev, ”Yeni həyat” qəzetinin məsul katibi Həsənağa Əliyev, Ağsaqqallar Şurasının Masallı şəhəri üzrə nümayəndəsi Eminağa Hüseynov COP29 beynəlxalq iqlim dəyişikliyi konfransının yaşıl dünya naminə həmrəylik və hazırda gərginlik yaşanan dünyamız üçün aktual olan sülh çağırışları baxımından xüsusi önəmindən, ölkəmizdə yaşıllaşdırma hərəkatı ilə bağlı həyata keçirilən tədbirlərdən,sadə insanların yaşıllaşdırma hərəkatında iştiraka təşviq edilməsi məqsədilə maarifləndirmə işlərinin aparılmasının vacibliyindən danışıblar.Tədbir daha sonra qarşılıqlı müzakirə formasında davam etdirilib.
İbrahim ŞÜKÜROV, Masallı rayon Ağsaqqallar Şurasının mətbuat katibi
Azərbaycan Jurnalistlər Birliyinin üzvü
"Yeni həyat" qəzeti,
www.yeniheyet.az
Вернуться назад