MDB müşahidə missiyasının üzvü: Azərbaycanın demokratik seçki ənənəsinin olması indi özünü daha aydın büruzə verir
1-02-2024, 15:50. Разместил: admin44
Fevralın 7-də prezident seçkilərinin yüksək səviyyədə təşkil ediləcəyini, demokratik prinsiplərin qorunacağını və şəffaf səsvermənin olacağını düşünürəm. Seçkiöncəsi mühit, namizədlərin təşviqat kampaniyası üçün yaradılan bərabər şərait də bu gözləntini artırır.
Bunu “secki-2024.az” saytına açıqlamasında prezident seçkilərini izləmək üçün Azərbaycana gələcək MDB müşahidə missiyasının Rusiyadan olan nümayəndəsi, Stavropol diyarında “Odlar Yurdu” Azərbaycan Milli Mədəniyyət Mərkəzinin rəhbəri Fəxrəddin Yarıyev söyləyib.
F. Yarıyev bundan əvvəl Azərbaycanda keçirilən parlament və prezident seçkilərində dəfələrlə beynəlxalq müşahidəçi kimi iştirak etdiyini diqqətə çatdıraraq bildirib: “Müşahidələrimə əsasən deyə bilərəm ki, Azərbaycanın beynəlxalq standartlara uyğun seçki ənənəsi formalaşıb. Bu ənənə özündə şəffaflıq, demokratik prinsiplərə əməl olunması, qanunvericiliyin tələblərinin dəqiqliklə yerinə yetirilməsi kimi prinsipləri əks etdirir. Azərbaycanın demokratik seçki ənənəsinin olması indi özünü daha aydın şəkildə büruzə verir. Müşahidə apardığımız bütün seçkilərdə bu mənzərənin şahidi olmuşam. Fevralın 7-dəki prezident seçkilərinin də bu prioritetlərə uyğun keçiriləcəyinə əminəm”.
Seçki günü bütün respublika üzrə səsvermə prosesini izləyəcəklərini qeyd edən müşahidəçi deyib: “Müxtəlif bölgələr üzrə aparılan müşahidələrin nəticəsi missiyanın rəhbərliyinə təqdim ediləcək, sonda yekun rəy açıqlanacaq. Seçkiöncəsi prosesləri kənardan da olsa izləyirik və indiyə qədər heç bir mənfi halın qeydə alınmaması deməyə əsas verir ki, fevralın 7-də beynəlxalq müşahidəçilərin işi o qədər də çətin olmayacaq”.
F. Yarıyev onu da vurğulayıb ki, Rusiya Federasiyası ərazisində olan Azərbaycan vətəndaşlarının da səsvermə hüququnun təmin edilməsi üçün bütün lazımi işlər görülüb. “Seçki məntəqələri yaradılıb və soydaşlarımız bu haqda məlumatlandırılıb. O cümlədən soydaşlarımız arasında səsvermə prosesi ilə bağlı maarifləndirmə işləri aparılır. Bu prosesə diaspor təşkilatları da yaxından dəstək verir. Hesab edirəm ki, Stavropol diyarında yaşayan Azərbaycan vətəndaşları seçkilərdə fəal iştirak edəcək və öz namizədlərinə səs verəcəklər”, - deyə o bildirib.
"Yeni həyat" qəzeti,
www.yeniheyet.az
Вернуться назад