ALLAH RƏHMƏT ELƏSİN
- 14-10-2023, 14:43
- Maraqlı
- 0
- 563
Rafiq Cabbar oğlu Rəsulov
Masallı rayon idman ictimaiyyətinə ağır itki üz vermişdir.
Gözəl insan, tanınmış ictimaiyyətçi, respublikanın əməkdar məşqçisi, fəxri bədən tərbiyəsi və idman işçısi, Azərbaycan Voleybol Federasiyasının (AVF) Rəyasət heyətinin üzvü, respublika və ümumittifaq dərəcəli hakim Rafiq Cabbar oğlu Rəsulov 14 oktyabr 2023-cü il tarixdə Bakı şəhərində vəfat etmişdir.
Rafiq Rəsulov 30 sentyabr 1944-cü ildə Masallı şəhərində anadan olmuşdur.
1961-ci ildə Masallı şəhər 2 nömrəli orta məktəbini, 1966-cı ildə Azərbaycan Dövlət Bədən Tərbiyəsi İnstitutunu bitirmişdir.
Əmək fəaliyyətinə Cəlilabad rayonunun Prişib qəsəbəsində (indiki Göytəpə qəsəbəsi) müəllim kimi başlamışdır.
Masallı Uşaq-Gənclər İdman Məktəbində metodist, məşqçi-müəllim (1970-1987), “Məhsul” Kənd Könüllü İdman Cəmiyyəti (KKİC) rayon şöbəsinin direktoru (1987-1990) işləmişdir.
1990-cı ildə “Viləş” futbol klubunun sədri seçilmişdir.
Masallı Rayon İcra Hakimiyyəti aparatında Ərazi idarəetmə şöbəsinin müdiri (1991-1993), RİHB-nın Masallı şəhəri üzrə nümayəndəsi (1993-1998), 1998-ci ildə Masallı RİHB aparatında baş referent vəzifələrində çalışmışdır.
Rafiq Rəsulov 1998-ci ildə yenidən idmana qayitmış, 1999-cu ildə gənclərdən ibarət voleybol komandasına rəhbərlik etmişdir. Komanda respublika spartakiadasının və “Məhsul” KKİC çempionatının qalibi olmuş, komandanın 12 üzvünə “SSRİ idman ustalığına namizəd” adı verilmişdir.
2001-2006-cı illərdə Masallının gənclərdən ibarət voleybol komandası 6 dəfə respublika çempionu, Təhsil Nazirliyinin keçirdiyi voleybol yarışlarının qalibi olmuş, respublikanın yüksək liqasında II və III yerlərə, Azərbaycan kubok oyunlarında III yerə layiq görülmüşdür.
Rafiq Rəsulov uzun illər AVF-nın çempionatlarında inspektor kimi çalışmışdır. 2001-ci ildən AVF-nın rəyasət heyətinin üzvü, 1975-ci ildə respublika dərəcəli, 1981-ci ildə Ümumittifaq dərəcəli hakim, 2004-cü ildə respublikanın Əməkdar məşqçisi, 2013-cü ildə Azərbaycan Respublikasının Fəxri Bədən Tərbiyəsi və İdman İşçısi adına, 2011-ci ildə AVF-nın xüsusi mükafatına layiq görülmüşdür.
Rafiq Rəsulov mehriban ailə başçısı, etibarlı dost, yaxşı yoldaş, gözəl insan idi.
Rafiq Rəsulovun işıqlı xatirəsi onu tanıyanların qəlbində əbədi yaşayacaqdır.
"Yeni həyat" qəzeti,
www.yeniheyet.az
