Qocaman müəllimə Azərbaycan Ağsaqqalar Şurasının Fəxri fərmanı təqdim edilib
19-02-2024, 10:31. Разместил: admin44
Masallıda bütün həyatını gənc nəslin təlim-tərbiyəsinə həsr edən Möhübbət Nurullayevin 85 illik yubileyi münasibətilə respublika Ağsaqqalar Şurasının ona ünvanlanan Fəxri fərmanın təqdimatı keçirilib.
Ağsaqqalar klubunda keçirilən tədbirdə Masallı rayon Ağsaqqalar Şurasının sədri Ələşrəf Niftiyev söhbət açaraq bildirib ki, Möhübbət Nurullayev 10 aprel 1938-ci ildə Masallı rayonunun Lürən kəndində anadan olub. 1960-1965-ci illərdə Azərbaycan Dövlət Pedaqoji İnstitutunda ali təhsil alıb, fizika-riyaziyyat müəllimi diplomu ilə ali təhsillilər sırasında kəndə qayıdıb. Həmin ildən taleyini məktəbə bağlayıb. 1965-1970-ci illərdə Mollaoba kənd 8 illik məktəbində, 1970-1976-cı illərdə Bədəlan kənd orta məktəbində, 1976-2011-ci illərdə Faiq Şükürov adına Lürən kənd orta məktəbində fizika-riyaziyyat müəllimi işləmişdir. Təqaüdə çıxana qədər doğma Lürən kəndində zəhmətkeş balalarına dərs demişdir. Masallıda Möhübbət Nurullayevi təcrübəli fizika-riyaziyyat müəllimi, təhsil işini yaxşı bilən mütəxəssis, gözəl insan, səmimi ailə başçısı kimi tanıyırlar.
Yubiley tədbirində iştirak edən qabaqcıl təhsil işçiləri, rayon və kənd ziyalıları, ağsaqqallar, jurnalistlər əvvəlcə tanınmış pedaqoq Möhübbət Nurullayevin həyat və fəaliyyətindən bəhs edərək onu təbrik ediblər.
Sonra ağsaqqal Balakərim Yaqubov, Mərkəzi Kitabxananın müdiri Zamin Məmmədov ağsaqqallardan Mirəyyub Əliyev, Lürən kəndindən olan şəhid Faiq Şükürovun qardaşı Mübariz Şükürov, Fəxrəddin Talıbzadə, sinif yoldaşı, Kosakül kənd sakini Asəf İbadov və başqaları yubilyarın qabaqcıl fizika – riyaziyyat müəllimi kimi rayonda təhsilin inkişafına verdiyi töhfələrdən danışıb, zəngin pedaqoji fəaliyyətindən söz açıb, ona xoş arzularını çatdırıblar. Natiqlər bildiriblər ki, nüfuzlu ağsaqqal, təcrübəli pedaqoq Möhübbət Nurullayevin həyatı gənclərimiz üçün əsl örnəkdir.
Yubilyar və övladlaı tədbirin təşkilatçılarına, iştirakçılara minnətdarlığını bildirib.
Ailəsi adından böyük oğlu, ali təhsilli hüquqşünas Tariyel Nurullayev danışıb, tədbirin təşkilatçılarına, şəxsən Masallı Rayon İcra Hakimiyyətinin başçısı cənab Araz Əhmədova minnətdarlıq ifadə edib.
Tədbirdə Möhübbət Nurullayevə səmərəli ictimai, pedoqoji fəaliyyətinə görə və 85 illik yubileyi münasibətilə Azəırbaycan Ağsaqqalar Şurasının İdarə Heyətinin qərarı ilə Fəxri fərmanı və məktubu təqdim edilib.
İbrahim ŞÜKÜROV,
Masallı rayon Ağsaqqalar Şurasının mətbuat katibi,
Azərbaycan Jurnalistlər Birliyinin üzvü.
"Yeni həyat" qəzeti,
www.yeniheyet.az
Вернуться назад