Göydən düşən müdirlər
2-04-2024, 09:21. Разместил: admin44
Göydən düşən müdirlər
və ya bir daha abunə məsələsi barədə
Belə-belə işlər
Qapını açıb müdirdən içəri girmək üçün icazə istədim. Ədəb-ərkanla salam verib özümü təqdim etdim. Məni tanıdınızmı, deyə soruşdum. Yox, tanımadım. Mən də deyəsən sizi xatırlaya bilmirəm, – öz növbəmdə cavab verdim. Sizə nə lazımdır, deyə hökmlə soruşdu.
-Görürsünüz ki, ağsaqqal adamam, icazə verəydiniz bir oturum, sonra tanışlığımıza çalışarıq. Məni qıyğacı süzüb sussa da oturdum.
-Ay müdir, mən Həsənağa Əliyevəm. Əlli iki ildir ki, rayon qəzetində çalışıram. Masallının elə guşəsi, elə idarəsi yoxdur ki, tanımayım. Sizin bu idarənin tədbirlərində də iştirakım çox olub. Azərbaycan Jurnalistlər Birliyinin üzvüyəm. Rayonda, ölkənin bir çox bölgəsində jurnalist-publisist kimi tanınıram. Hazırda rayon Ağsaqqallar Şurasının idarə heyətinin də üzvüyəm. Ziyalılar Cəmiyyətində öz yerim var. On iki publisist kitabın müəllifiyəm. Sonuncu kitabım şəhidlərimiz barədədir. Sözüm budur ki, necə olur bir-birimizi tanımırıq və təəccüb edirəm, necə olur ki, “hop edib” gəlib bu kresloya sahib olubsuz?
Müdir yenə yüksək səslə: adamları vəzifəyə siz qoyursuz? Mən də ötkəm səslə: bəli, mən seçirəm. Necə olur ki, mənim də, ictimaiyyətin də tanımadığı bir şəxs bu vəzifəyə qalxıb. Oğul, sən bu kürsüyə qalxana kimi gərək rayon ictimaiyyəti tərəfindən tanınaydın ki, heç kim barmağını dişləyib deməsin: ey dadi-bidad, bu hardan gəlib bu pilləyə qalxıb? Çünki biz nəsildən olanlar həmişə görüblər ki, rayonun ictimai-siyasi həyatında fəal olanlar irəli çəkilir. Heç olmazsa çalışdığınız sahədə tanınaydınız. Hamı bilməlidir ki, sən yaxşı mühəndis, iqtisadçı, həkim, müəllim və nə bilim nə olubsan. Hamı bu vəzifəyə təsadüfi gəlmədiyinizi təsdiqləyəydi. Müdir, siz hələ vətəndaşları qəbul etmək qaydalarını bacarmırsınız.
Müdir yenə ötkəm səslə nəticəyə, məqsədə gəlin, deyə soruşdu:
-Müdir, mən rayon qəzetinə abunədə bizə dəstək olmağınızın xahişinə gəlmişəm. Bir əsrə yaxın bu məcmuənin yaşamasına kömək göstərəsiniz.
-Yox, bu mümkün deyil, indi abunə könüllüdür. Odur mən heç kimdən bunu tələb edə bilmərəm. İndi rüşvət də ala bilmirik ki, qəzetə kömək edək.
Dedim ki, müdir, biz sizin rüşvət alıb-almadığınıza görə gəlməmişik. O işə əncam çəkən təçkilatar da var. Gəlmişik ki, böyük müəssisəniz var. Sizin tədbirlərinizi mütəmadi işıqlandırırıq. Rüşvət alıb-almamağınızla bağlı əlimizdə fakt var. Lap bu yaxınlarda bir işçini işə götürmüsünüz. Ondan yararlanmısınız. Amma sizin məfkurənizə bələd olduq. Biz getdik. Sizin kimi göydən düşən müdir rayonda çoxdur. Ziyalılıqdan uzaq olan belə müdirlərin təkəbbürünə baxmayaraq biz “Yeni həyat”ı yaşadacağıq. Çünki, bu qəzet rayona gərəkdir, əsl ziyalıların səbirsizliklə gözlədiyi mətbu orqandır.
Həsənağa ƏLİ MURTUZA
"Yeni həyat" qəzeti,
www.yeniheyet.az
Вернуться назад