Azərbaycan-Pakistan münasibətlərində yeni səhifələr
14-07-2024, 21:30. Разместил: admin44
Pakistan İslam Respublikası Azərbaycanın müstəqilliyini tanıyan ilk dövlətlərdəndir. Ölkələr arasındakı diplomatik münasibətlər 33 il əvvəl qurulub. Hakimiyyətdə hansı siyasi qüvvənin olmasına baxmayaraq Azərbaycan - Pakistan əlaqələri tarixi köklərə, ortaq dəyərlərə söykənməklə bu gün yüksək səviyyədə davam edir. Müstəqilliyimizin ilk günlərindən etibarən Azərbaycan Pakistanın dəstəyini hiss etməkdədir. Necə ki, bundan öncəki dövrdə olduğu kimi 44 günlük Vətən müharibəsində də qardaş Türkiyə dövləti ilə yanaşı Pakistan da yanımızda oldu.Azərbaycan Respublikasının Prezidenti İlham Əliyevin iyulun 11-də Pakistan İslam Respublikasına dövlət səfəri hərtərəfli əlaqələrin, möhkəm müttəfiqliyin bariz nümunəsidir. Pakistanın Baş naziri Məhəmməd Şahbaz Şərifin vurğuladığı kimi: “Azərbaycan xalqı Pakistan xalqını sevir. Qarşılıqlı olaraq Pakistan xalqı da Azərbaycan xalqına çox minnətdardır və onu sevir. Bu, sanki bir qəlbdə döyünən iki ürəkdir. Bu dostluq, qardaşlıq yeni deyil. O, onillikləri əhatə edir. Pakistan həmişə hər məsələdə Azərbaycanın yanında olub və Azərbaycan da hər zaman bütün hallarda Pakistanın yanında olub. İstər söhbət BMT-nin Təhlükəsizlik Şurasının qətnamələrində təsbit edilmiş hüquqları ilə bağlı Kəşmir əhalisinə dəstəkdən və əlbəttə ki, istərsə də bir çoxlarının dəstəklədiyi referendum keçirmək hüququndan getsin. Pakistan Qarabağ məsələsində həmişə Azərbaycanın mövqeyini dəstəkləmişdir və heç vaxt dəstəyini dayandırmamışdır. Hesab edirəm ki, bu, bizim dostluq və qardaşlıq münasibətlərimizin gücüdür.”
Ölkə rəhbərimizin Pakistana səfərinin ilk notları bütün dünyaya sarsılmaz iki dövlət dostluğunun mesajını çatdırdı, desək yanılmarıq. Prezidentimizə xüsusi hörmət əlaməti kimi dövlət başçımızın təyyarəsinin Pakistan Hərbi Hava Qüvvələlərinə məxsus qırıcı təyyarələr vasitəsilə öz səmalarında qarşılanaraq müşayiət edilməsi yadda qalan tarixi anlara çevrildi.
İslamabadda Prezident İlham Əliyevin Pakistan İslam Respublikasının Prezidenti Asif Əli Zərdari ilə geniş tərkibdə görüş zamanı ölkələrimiz arasında iqtisadi-ticari əlaqələrin, investisiya sahəsində əməkdaşlığın daha da genişləndirilməsi məsələlərinin müzakirəsi, qarşılıqlı maraq doğuran digər məsələlər ətrafında fikir mübadiləsinin aparılması, Pakistanın Baş naziri Məhəmməd Şahbaz Şərif ilə məhdud və geniş tərkibdə görüşü, mətbuata bəyanatlarla çıxışları, İslamabadda Pakistan Hərbi Hava Qüvvələrinin Nur Xan bazasının ərazisindəki “Milli Aerokosmik Elm və Texnologiya Parkı”nda (NASTP) hərbi sərgi ilə tanışlıq, əksər sahələr üzrə dövlətlərarası sənədlərin imzalanması xüsusi əhəmiyyət kəsb etməklə yanaşı dostluq əlaqələrinin daha da güclənməsidir.
Prezident İlham Əliyev mətbuata bəyanatında dediyi fikirlər yuxarıda sadalanan fikirlərimizi bir daha təsdiqləyir: “İkinci Qarabağ müharibəsi – Vətən müharibəsi zamanı siyasi dəstək və Azərbaycanın haqlı mövqeyini dəstəkləyən Pakistanın yüksəkrütbəli rəsmilərinin birmənalı bəyanatları bizə əlavə güc-qüvvət verdi. Pakistan məhz işğala görə Ermənistanla diplomatik münasibətləri qurmayan ölkədir. 2020-ci ilin noyabrında Qələbəmizi qeyd etdiyimiz zaman xalqımızın əllərində Azərbaycan, Pakistan və Türkiyənin bayraqları var idi. Bu, bizim münasibətlərimizi unikal edir. Bu gün praktiki layihələrlə bağlı bu münasibətləri hiss etmək üçün müzakirə etdiklərimiz bu bünövrəyə əsaslanır...”
İnanırıq ki, daha parlaq sabahlara doğru dinamik dövrünü yaşayan Azərbaycan-Pakistan əlaqələri daha da genişlənərək hər iki ölkənin iqtisadi, strateji inkişafına əhəmiyyətli töhfələr verəcək.
Əlifağa YAQUBOV,
Masallı rayonu, Ərkivan qəsəbə sakini
Вернуться назад