Nadir Ağayevin xatirə turnirində
- 30-10-2025, 09:32
- İdman
- 0
- 543
Masallıda 200 güləşçi qüvvəsini sınayıb
Masallıda SSRİ idman ustası, Azərbaycan Respublikasının Əməkdar məşqçisi, tanınmış pəhləvan Nadir Yaqub oğlu Ağayevin (1935-1985) xatirəsinə həsr olunmuş yunan-Roma güləşi üzrə yeniyetmələr arasında XXIX ənənəvi respublika turniri keçirilib.
Ustad pedaqoq və idman fəadisi Nadir Ağayevin anadan olmasının 90 illik yubileyi ilə əlaqədar Masallı Olimpiya İdman Kompleksində keçirilən idman tədbiri öncəsi Ümummilli lider Heydər Əliyevin və Azərbaycanın müstəqilliyi, ərazi bütövlüyü uğrunda canından keçən Vətən övladlarının, eləcə də Nadir Ağayevin timsalında dünyasını dəyişən idmançıların əziz xatirəsi bir dəqiqəlik sükutla yad edilib, Dövlət Himnimiz səsləndirilib.
Lənkəran-Astara Regional Gənclər və İdman İdarəsinin rəisi Teymur Babazadə, Azərbaycan Güləş Federasiyasının əməkdaşı, “Şöhrət” ordenli Elçin Cəfərov, Nadir Ağayevin yetirməsi, turnirin sponsoru, Rusiya Federasiyasının Əməkdar məşqçisi, Şimal-Qərb dairəsi üzrə Güləş Federasiyasının prezidenti Məşkur Qasımov Nadir Ağayev güləş məktəbinin Azərbaycan idmanında tutduğu mövqedən danışıb, mötəbər yarışlarda əldə edilən nailiyyətlərin ölkə rəhbəri, Milli Olimpiya Komitəsinin Prezidenti İlham Əliyev tərəfindən idmana göstərilən diqqət və qayğının təzahürü kimi səciyyələndiriblər.
Bildirilib ki, yarışın keçirilməsində məqsəd Nadir Ağayevin keçdiyi şərəfli idman yolunun təbliği, yeniyetmələr arasında yunan-Roma güləşi idman növünün inkişafı və kütləviliyi, onların vətənpərvərlik ruhunda tərbiyəsi, idmançılar arasında dostluq əlaqələrinin möhkəmləndirilməsi, eləcə də yeniyetmələrdən ibarət ölkə yığma komandasına namizədlərin seçilməsidir.
Nadir Ağayevin qohumu, Azərbaycan İdman Jurnalistləri Assosiasiyasının bölgə nümayəndəsi Akif Ağayev turnirin təşkilinə görə Gənclər və İdman Nazirliyinə, Güləş Federasiyasına, Masallı Rayon İcra Hakimiyyətinə, Rusiya Federasiyasının əməkdar məşqçiləri Məşkur və Qasıməli Qasımov qardaşlarına minnətdarlıq bildirib.
Tədbirin bədii hissəsində tanınmış müğənni Miriş Hüseynov, “Halay” folklor xalq kollektivi və “Masallı” rəqs qrupu üzvlərinin ifasında musiqi nömrələri nümayiş olunub.
Açılış mərasimindən sonra meydan yeniyetmə bahadırların ixtiyarına verilib.
Məlumat üçün bildirək ki, 28-29 oktyabr 2025-ci il tarixdə keçirilən açıq turnirdə 2009-20011-ci il təvəllüdlü (U-17) yunan-romaçılar 10 çəki dərəcəsində mübarizə aparıb.
Dünya Güləş Birliyinin təsdiq etdiyi qaydalara uyğun olaraq beynəlxalq dərəcəli hakim Qərib Əliyevin rəhbərliyi ilə AGF-nin hakimlər heyəti tərəfindən idarə edilən yarışlarda respublikanın rayon və şəhərlərindən 22 komandanın tərkibində 200 idmançı qüvvəsini sınayıb.
Qalib güləşçilər təşkilat komitəsi və sponsor tərəfindən müvafiq dərəcəli diplom, medal və pul mükafatları ilə təltif olunublar.
Turnirin yekun nəticələrinə əsasən komanda hesabında Lənkəran komandası birinci, Bakının “Lokomotiv” və “Gimnaziya” təmsilçiləri isə müvafiq olaraq ikinci və üçüncü yerə layiq görülüblər.
Masallı Uşaq-Gənclər İdman-Şahmat Məktəbinin yetirmələri Baloğlanov Əli Emin oğlu (45 kq) və Məmmədli Sadiq Elnur oğlu (110 kq) üçüncü yerə layiq görülüblər. İdmançıları yarışa Masallı UGİŞM-nin məşqçi-müəllimi Samir Rəhmanov hazırlayıb.
Qeyd edək ki, yarışın keçirilməsində məqsəd Nadir Ağayevin şərəfli idman yolunun təbliği, yeniyetmələr arasında yunan-Roma güləşinin inkişafı eləcə də yeniyetmələrdən ibarət yığma komanda üçün perspektivli idmançıların seçilməsidir.
Akif VAQİFOĞLU.
