Perspektivli idmançıların aşkarlanması
- 27-01-2026, 10:59
- İdman
- 0
- 3 784
Masallı Uşaq-Gənclər İdman-Şahmat Məktəbinin (UGİŞM) təşkilatçılığı ilə 20 Yanvar faciəsi şəhidlərinin xatirəsinə həsr olunmuş məktəblilər arasında şahmat, yunan-Roma və sərbəst güləş, futbol, voleybol və stolüstü tennis üzrə turnirlər keçirilib.
Yarışlarda rayonun müxtəlif ümumtəhsil məktəblərini təmsil edən idmançılar iştirak ediblər. Turnirlərdən öncə 20 Yanvar şəhidlərinin əziz xatirəsi bir dəqiqəlik sükutla yad edilib, azadlıq uğrunda canlarından keçən qəhrəmanların mübarizəsinin Azərbaycanın müstəqilliyinə aparan şanlı yolun əsasını qoyduğu vurğulanıb.
Gərgin və maraqlı mübarizə şəraitində keçən yarışların yekun nəticələrinə əsasən qaliblər UGİŞM-nin müvafiq dərəcəli diplom və medalları ilə təltif olunublar. Yarışların keçirilməsində məqsəd şəhidlərimizin xatirəsinin yaşadılması, uşaq və yeniyetmələr arasında idmana marağın artırılması, eləcə də perspektivli idmançıların aşkarlanmasıdır.
Bununla yanaşı, UGİŞM-nin yetirmələri respublika miqyaslı yarışlarda da uğurlu nəticələr göstəriblər. Gəncə şəhərində keçirilən sərbəst güləş üzrə yeniyetmələr arasında açıq birincilikdə Həmzə Əzizov (32 kq) və Əli Məlikzadə (75 kq) ikinci, Yusif Abdullayev (26 kq) isə üçüncü yerə layiq görülüb. Bakı şəhərində təşkil olunan Abşeron açıq birinciliyində Əli Baloğlanov (48 kq) birinci, Gəncə şəhərində keçirilən yeniyetmələr (U-15) arasında “Oksi Kəməri” mükafatı uğrunda açıq respublika turnirində isə ikinci yerə sahib olub.
Astara şəhərində 17 Noyabr – Milli Dirçəliş Gününə həsr olunmuş sərbəst güləş üzrə açıq birincilikdə Rəhim Rəhmanov (32 kq), Əli Baloğlanov (48 kq) və Anar Poladov (65 kq) ikinci, Şahmar Mürşüdov (23 kq), Məhəmməd Qafarzadə (26 kq), Pənah Qasımlı, Dilarə Həsənova (42 kq) və İzzət Məmmədzadə (57 kq) üçüncü yerləri tutublar. Yunan-Roma güləşi üzrə isə Seyidmusa Tağıyev (23 kq) ikinci olub.
Abşeron rayonu Xırdalan OEİGİM-in açıq birinciliyində Bilal Nuriyev (29 kq) birinci, Şahnur Mürşüdov (26 kq) və İzzət Məmmədzadə (55 kq) ikinci, Məhəmməd Qafarzadə, Yusif Abdullayev (29 kq) və Həmzə Əzizov (35 kq) isə üçüncü yerlərə layiq görülüblər.
İdmançıları yarışlara Masallı UGİŞM-nin məşqçi-müəllimləri Cavad Həsənov, Maqsud Ağayev, Samir Rəhmanov və Rafael Həsənov hazırlayıblar.
Şirziyad MEHDİYEV,
Azərbaycan Jurnalistlər Birliyinin üzvü.
