Replika
21-08-2024, 17:24. Разместил: admin44
Bəndə düşən sosial yardım
Amma baxır kim üçün bəndə düşür, kimlərin isə bu yolda “bəxti” gətirir. O baxır daydayıya. Kimin ki, güclü arxası var, əziyyət çəkmədən sosial yardım alır. Qəlibə düşdü, düşmədi. Vay o kəslərin halına ki, dilsiz-ağılsız, dayıdaysızdır. Onda gör başına nə oyunlar açırlar. Gəlib evində hər nəyi – bitdən sirkəyə kimi yoxlayırlar. Harda işləyirsən, evin neçə mərtəbədir, işıq pulu, qaz pulunun qəbzlərini gətir. Neçə heyvan, toyuğun, xoruzun var, xoruzun gündə neçə yumurta hasilə gətirir, toyuq basdırmısanmı, altına neçə yumurta qoyubsan, niyə az bala çıxarıb? Hələ başqa quşlar da qeydiyyata alınır. Üstəlik soyuducunun içində nəyin olub-olmadığını, evdə neçə elektrik lampasının yandığını da qeyd edirlər. Hələ ayaqyolunda lampa asıbsansa batdın.
Sonra da çıxırlar ikinci mərtəbəyə. Yataq otağını axtarırlar. Xanımların alt paltarları ilə maraqlanırlar ki, qiyməti neçiyədir. Qonşu Kinəvəs xalanı həyətdə görsələr onda iş lap düyünə düşər. Xoş-zor sən bu evdə yaşayırsan. Kinəvəs xala and-aman edir ki, Vallah, billah mən qonşuyam, hərdən gəlib bir-birimizi axtarırıq.
Bax, onda hər kəs bu qeydlərdən bezib, cəhənnəm olsun sosial yardım, deyə bezar qalır.
Hələ bir müddət sonra yenə gəlib təkrar “yoxlamalar” aparılır. Sən demişdin ki, toyuğun altına 15 yumurta qoyubsan, bəs niyə 10 bala çıxarıb. Bu paltarların yerini niyə dəyişibsən? Digəl həftəbecər suallara cavab tapıb yoxlamaya gələnləri inandır. Ev sahibəsi təbi-halından çıxıb qışqırır:
A bala, bax, qonşunun iki mərtəbəli küləfirəngisi, bərk gedən maşını, inəyi, sayılı sürüsü, həyət-bacasında 100-ə yaxın hind toyuğu, quşu, ördəyi, qazı. Arvadı da işləyib dövlətdən məvacib alır. Necə olur belələrinə sosial yardım düşür, mənim kimi kasıb-kusuba yox?
Xülasə, bu çox qəliz məsələdir. Burda “Bir qalanın sirri” filimindəki Göygöz kosanın filfilosu gərəkdir ki, belə yoxlamanı selə-suya qərq etsin.
Hər həftə RİH başçısının qəbuluna, rayonun ayrı-ayrı idarələrinə onlarca vətəndaş gedib sosial vəziyyətinin ağırlığından yardıma ehtiyacı olduğu barədə müraciət edir. Onlar da etiraf edirlər ki, sosial yardımı ehtiyacı olanlar deyil, imkanlılar alır. Sosial təminat təşkilatı bu sahədə elə at oynadır ki, heç kim baş çıxarmır. Vallah, bu lap sirri-xudadır. Sonda avtobusda bir qadının qarğışını sosial təminat idarəsinin rəhbərlərinə çatdırırıq.
Kim ki, haqqı qoyub nahaqqa rəvac verər, Allah onda olmayan vicdanını kəssin, onu da mənim kimi kimsəsiz imkansız, zəlili-xar etsin, balaları qara çörək üçün gəzsin.
Ölkəmizdə heç kim kimsəsiz deyil. Bizim Qarabağ fatehimiz İlham Əliyev kimi Prezdentimiz var. Vallah bir gün zavala gələcəksiniz, erməniləri zəlili-xar edən Dəmir yumruq bir gün sizin də başınızı əzəcək. Qanundan, Prezidentimizdən və nəhayət ki, Allahdan qorxun. Başqasının halalını haram edən vələdəzunahdır. Bundan başqa söz tapmırıq.
“Yeni həyat”.
Вернуться назад