Ərkivanlı atletin Budapeşt uğuru
- 13-10-2025, 06:42
- İdman
- 0
- 752
Masallı rayonunun Ərkivan qəsəbəsindən olan Ağa Ağazadə “SPAR Budapeşt Marafonu”nda uğurla çıxış edərək medal qazanıb.
12 oktyabr 2025-ci il tarixində Macarıstanın paytaxtı Budapeştdə keçirilən marafonda iştirak edən Ağa Ağazadə 42,195 kilometr məsafəni (tam marafon) təyin olunmuş vaxtda qət edərək finişə çatıb və yarışın sertifikatı ilə yanaşı medalına da layiq görülüb.
Dünyanın müxtəlif ölkələrindən peşəkar atletlərin qatıldığı bu nüfuzlu yarışda Azərbaycanı “Baku Marafon Klubu”nun dörd üzvü təmsil edib və onların hər biri medal qazanaraq qaliblər sırasında yer alıb.
İxtisasca uroloq-androloq olan, həmçinin 44 günlük Vətən müharibəsinin iştirakçısı kimi tanınan Ağa Ağazadə bildirib ki, bu ilin avqust ayında dizimdən əməliyyat olunsam da, bu möhtəşəm yarışda iştirak edib mükafat qazanmaq mənim üçün həyatımın ən önəmli hadisələrindən biridir.
Qeyd edək ki, digər medalçımız Elnur Amanov da Masallı rayonundandır.
Xatırladaq ki, “SPAR Budapeşt Marafonu” Macarıstanın ən önəmli yol qaçışı tədbirlərindən biri olmaqla yanaşı, Mərkəzi Avropanın da qaçış təqvimində mühüm yer tutur. Marafon sürətli və mənzərəli marşrutu ilə seçilir — iştirakçılar Budapeştin mərkəzindən keçərək Buda Qalası, Parlament binası və Zəncir Körpüsü kimi tanınmış memarlıq abidələrinin önündən keçirlər. Yarış 1989-cu ildən etibarən BSI tərəfindən təşkil olunur və həm yerli, həm də beynəlxalq iştirakçılar üçün yüksək səviyyəli idman təcrübəsi təqdim edir.
Akif AĞAYEV
